PA’PUDIAN 138 - Sura' Madatu

Pa’kurre sumanga’ diona kamasokananNa Puang Matua 138:1-8

¹ Pa’pudianna Daud. La ponno penaangku umpudiKomi, sia la umpakendekna’ pa’pudian mati’ Kalemi dio olona mintu’ deata.

² La menombana’ umpentingayoi banua kabusungamMi, sia la umpudina’ sangamMi tu belanna kamasokanamMi sia kamarurusamMi, belanna Mipakasallemo tu pangallu’Mi tete dio sanga mala’biMi.

³ Iatongku meongli’, Mitananni siamo’ talinga, sia Mipabatta’ tu penaangku anna bantang.

⁴ Mintu’ datu lan lino la umpudiKomi, o PUANG, ke narangimi tu kada ombo’ dio randan pudukMi.

⁵ Sia la menani tu tau iato mai diona mintu’ lalanNa PUANG, belanna kapua tu kamala’biranNa PUANG.

⁶ Tonganna kumua matande liu tu PUANG, anNa tiro lumbang to umpopengkadiongan penaanna, na iatu to matampo mambelapa naissanni.

⁷ Iake lanna’ kamaparrisan, manassa Mirinding pala’na’; sia la Mie’te’ tu limamMi umbali kasengkeanna mintu’ ualingku, sia lima kananMi ullendokanna’.

⁸ PUANG la umpatepuanna’ tu iannato! O PUANG iatu kamasokanamMi tang tileluk sae lakona. Da amMi tampei tu pengkarangamMi!