PA’PUDIAN 130 - Sura' Madatu

Nanian lu diong mai liku mandalan 130:1-8

¹ Nanian Hamaa’lot. Meongli’na’ Mati’ diong mai liku mandalan, o PUANG.

² O Puang, perangii tu gamarangku, sangapaoi amMi tanding talingai tu mintu’ pengkamoyaku.

³ O PUANG, iake la Mipalanni ara’ tu salaki, mindara tu ma’din untananni bendan, o Puang?

⁴ Apa dio kalemi den kaumpa’deian kasalan, kumua anna kabangnga’Komi tau.

⁵ Umpeagina’ PUANG, ondongpi iatu deatangku ma’peagi-agi, sia urrannuanna’ kadanNa.

⁶ Iatu sumanga’ku umpeagi Puang, mandu ia anna pa’kampa babangan umpeagi dannari lambe’, mandu ia anna pa’kampa babangan umpeagi dannari lambe’.

⁷ E to Israel, sande’komi lako PUANG! Belanna dio PUANG den kamasokanan, sia den duka buda kadilendokan dio.

⁸ Sia la Nalendokan duka tu to Israel dio mai mintu’ salana.