PA’PUDIAN 12 - Sura' Madatu

Pangando malaku dirinding pala’ dio mai to kadake 12:1-9

¹ Lu lakona pangala sengo. Diala madiong. Pa’pudianna Daud.

² Karitutui, PUANG, belanna tae’mo to mengkaola, sia madarang sa’pemo tu to maruru’ dio lu mintu’ ma’rupa tau.

³ Tau iato mai ma’ulelean leko’ sola solana, sia pudukna ussa’bu’ passede situang penaa kera.

⁴ Sanggangimi, PUANG, tu mintu’ puduk passede sia mintu’ lila ma’kada madongnga’.

⁵ Iamotu mintu’ to ma’kada nakua: Lilaki la kipopatalo! Sia pudukki umpangeaikan; mindapara tu la umparentakan?

⁶ Tu belanna kamaparrisanna to dipandasa sia belanna sarrona to mase-mase, la ke’de’Na’ totemo, Nakua kadanNa PUANG, la Kupalan tang nalambi’na peroso kalando tu to ungkamali’i dikarimmanni.

⁷ Iatu kadanNa PUANG, iamo kada madatu, susi salaka, disudi lan pa’paredean dio padang, sia pempitu disa’po.

⁸ O PUANG, Kamumo la ungkampaikan to makario-rio, sia Kamumo la tontong urrinding pala’kan dio mai to tama bilangan iate.

⁹ Mintu’na to tang mekaaluk lumiling palong. Sia patompo’mo tu kamegi’giran dio lu ma’rupa tau.