PA’PUDIAN 113 - Sura' Madatu

Puang Matua umpamala’bi’ to bongko 113:1-9

¹ Haleluya! Pudimi, e kamu taunNa PUANG, pudimi tu sanganNa PUANG!

² Mintu’na kadipudian lu lako nasang sanganNa PUANG, randuk totemo landa’ sae lakona.

³ Iatu sanganNa PUANG sipatu dipudi randuk dio mai kadellekan allo landa’ lako kabotoan kulla’.

⁴ Iatu PUANG undoanni mintu’ bangsa, sia iatu kamala’biranNa untongloi langi’.

⁵ Mindara la sitinti batunna tu PUANG, Kapenombanta, tu unnisung dao masuanggana.

⁶ Sia kumorong rokko anNa linde-lindei tu mintu’ lanna langi’ sia lanna lino?

⁷ Ia unnendekan to bongko diong mai to’ barra’-barra’, sia umbangunan to mase-mase diong mai to’ so’mak.

⁸ La Napasango’koran to mala’bi’, iamotu mintu’ to mala’bi’na tau iato mai.

⁹ Iatu to tamanang lan tananan dapo’na Napatulangdan Napoindo’ ba’tu pira-pira pia anna parannu paiman. Haleluya!