PA’PUDIAN 111 - Sura' Madatu

Pa’kurre sumanga’ belanna mintu’ pa’kamaseNa Puang Matua 111:1-10

¹ Haleluya! La umpudina’ PUANG situang penaa kalebungku, lan kombonganna sia tinimbunna to bulo lollong.

² Mala’bi’ tongan tu mintu’ penggauranNa PUANG, tu sipatu nanannung mintu’ to umposendei.

³ Mala’bi’ sia tarompo’ penggauranNa Puang, sia iatu kamaloloanNa tontong sae lakona.

⁴ Mangkamo unggaraga tanda dianna batu silambi’ diona mintu’ pengauran kalle-kalleanNa; Iatu PUANG maturu-turu sia mamase.

⁵ Naben kande lako tu to ungkataku’I; sia Nakilalai tu basseNa tontong sae lakona.

⁶ Umpapayanmo kuasa penggauranNa lako taunNa, diona kaumpa’benganNa mana’na mintu’ to kapere’.

⁷ Iatu lalan limanNa iamo kamanapparan sia katonganan, sia tappa’ mintu’ parentaNa.

⁸ Mintu’na to dipantokmo tontong sae lakona, sia dipogau’mo situang kamanapparan sia kabulo-lollongan.

⁹ Napadenan kadilendokan tu taunNa, sia Naarra’i tu basseNa tontong sae lakona; iatu sanganNa masero sia metakuran.

¹⁰ Iatu ungkataku’ PUANG oto’na mintu’ kakinaan; minda-minda umpogau’i susito, iamoto kinaa. Sia iatu kadipudianNa tontong sae lakona.