PA’PUDIAN 110 - Sura' Madatu

Diona datu urrapi’ lampa kaminaan 110:1-7

¹ Pa’pudianna Daud. Susite tu kadanNa PUANG lako Puangku Nakua: Nno’ko’Ko dio kananKu, sae lako Kupopengkanorongna nasang tu mai ualimMu Mupolilli’ lentek.

² PUANG la umpopangayo tekken kapayungan lan mai Sion tanda kuasammu: La sikambi’Ko parenta dio lu to’ ualimMu.

³ Iatu taumMu masorok penaanna ussorong kalena, ke Muarakki lao parari. Anna situang kassa’ diangkaran lako malolona tu to manguramMu siduruk lako Kalemu, butungi to to’do ambun natambuk dannari lambe’.

⁴ Umpalaomo sumpa tu PUANG sia tang la menassan: Ikomo Tominaa tontong sae lakona unturu’ lalanna Melkisedek;

⁵ Iatu Puang dio kananMu. Ia ussolangi ba’tu pira-pira datu-datu ke allo kasengkeanNai.

⁶ Ia duka la ullampak ukungan dio lu to kapere’, anNa pasitutu’i batang rabuk tu mintu’ inan, sia la Napatombonan ulu tu rante kalua’.

⁷ La unniru’ uai salossok dio lu lalan; iamoto anna umbangunan ulunna sule.