PA’PUDIAN 108 - Sura' Madatu

Pa’kurre sumanga’ sia passambayang umpalaku kasalamaran 108:1-14

¹ Misa’ nanian. Pa’pudianna Daud.

² Rapa’mo tu penaangku, o Puang Matua, la menanina’ sia umpakendek pa’pudian situang penaa kalebungku.

³ Millikkomi, e dandi sia katapi, la untundanna’ dannari lambe’.

⁴ O PUANG, la kupudiKomi lan lu mintu’ bangsa, sia la umpakendekna’ pa’pudian mati’ lan lu mintu’ to sangpetayanan.

⁵ Belanna iatu kamasokanamMi untongloi langi’, sia iatu kamarurusamMi tu’tun dao massaliu’na!

⁶ Pamatandei tu Kalemi daona lu langi’, o Puang Matua, sia sangapaoi anna ussamboi lino tu kamala’biramMi.

⁷ Anna tilendok tu mintu’ to Mipakaboro’, rinding pala’kan lima kananMi sia tanding talingakan.

⁸ Mangkamo ma’kada tu Puang Matua lan inan maindanNa. La mela’tekna’, sia la kutaa-taa tu Sikhem, sia la kusuka’ tu rantena Sukot.

⁹ Iatu Gilead taaku, sia iatu Manasye taaku duka, na iatu Efraim iamo sarong batungku, sia iatu Yehuda iamo tekken kapayungangku.

¹⁰ Na iatu Moab pembasean lentekku; anna iatu Edom la kunii umpellebaran sepatungku, la unnarrakna’, belanna kutalo tu tondok Filistea.

¹¹ Mindara tu la umbaana’ tama tondok ditambakuku? Mindara tu la ussolanna’ lako Edom?

¹² Tang Kamuraka, o Puang Matua, tu mangka ussualekan? Tae’moraka Mila sun ussolan mintu’ to pararingki, o Puang Matua?

¹³ Tunduikan unnea ualingki, belanna tae’ gai’na tu pa’tunduan tolino.

¹⁴ Tete dio pa’tunduanNa Puang Matua angki pogau’ ma’lalong-lalong, belanna Ia la ullullu’ ualingki.