PA’PUDIAN 102 - Sura' Madatu

Passambayang umpangandoan Sion 102:1-29

¹ Passambayangna to mandasa bang, ke tang naattami sia untua’ sarrona dio oloNa PUANG.

² O PUANG, tananni talinga tu passambayangku, sia sangapaoi anna rampo mati’ Kalemi tu pengkamoyaku.

³ Da Mibunianna’ lindoMi ke nalambi’na’ attu kamandasan; tanannina’ talingamMi; sia perangiina’ madomi’, ke meongli’na’.

⁴ Belanna iatu katuoangku labu’ butung rambu, sia mintu’ bukungku malassuk susi api dukku.

⁵ Iatu penaangku malayu butung riu nala’da’ allo, belanna tang kupoinaa kumande.

⁶ Iatu kuli’ku la’ka’ lako bukungku, napobua’ sarro budangku.

⁷ Butungna’ kayo dio lu padang aak, sia tenmo’ langau to’ batu dio tondok daun lauan.

⁸ Maroyana’ sia butungna’ Manuk-manuk torro misa dao bubungan.

⁹ Kiallo-kiallo nabe’sena’ mintu’ ualingku, sia mintu’ tu to sumadang-madang lako kaleku, unggatai tau, umpotandaran kada sangangku;

¹⁰ Belanna ungkandena’ au butung bo’bo’, sia kuto’bo’ uai mata tu kuiru’na,

¹¹ Diona kare’dekamMi sia kasengkeamMi. Belanna mangkamo’ Miangka’, amMi tibe polena’ sule.

¹² Iatu katuoangku susito bayo-bayo kalando, sia malayuna’ ten to riu.

¹³ Apa Kamu, o Puang, unnisung tontong sae lakona, sia iatu kadiannamMi batu silambi’ disituran-turananni.

¹⁴ La ke’deKomi sia la ungkaturu-turui Sion, belanna iatu attu ungkaturu-turui, tu attu pura dilampak nalambi’mo!

¹⁵ Belanna mintu’ taumMi ungkamali’ batunna Sion, sia tang namasean tu barra’-barra’na.

¹⁶ Susinnamoto la nanii mintu’ bangsa ungkataku’ sanganNa PUANG, sia mintu’ datu lan te lino la ungkataku’ kamala’biramMi.

¹⁷ Belanna Nabangunmo PUANG tu Sion, anna payan tu Puang situang kamala’biranNa.

¹⁸ Napalempeimo talinga tu passambayangna to dipangrampai, na iatu passambayangna tae’ anNa tiro baitti’i.

¹⁹ Iatu iannate la disurasan to dadi undi, kumua anna iatu bangsa la dipaden undinna la umpudi PUANG.

²⁰ Belanna Natiro lumbangmo Puang dao mai masuanggana inan maindanNa. Ondongpi lan mai suruga Naniimo ma’pemantang tama te lino.

²¹ La umperangii sarrona mintu’ to dipattang, sia la urrampanan mintu’ to dilampakmo la dipatei.

²² Kumua anna pa’peissananni tau dio lu Sion tu sanganNa PUANG, sia dio lu Yerusalem tu kadipudianNa,

²³ To ke sangsirampunanni tu mintu’ bangsa sia mintu’ parenta la umpengkaolai PUANG.

²⁴ Iamo umpamoro’ kamawatangangku dio lu lalan, sia umpamadenge’ sunga’ku.

²⁵ Kukuami: O Kapenombangku, da Mibaana’ lako kamatangnganna sunga’ku. Iatu mintu’ taunMi sipapa’ sae lakona.

²⁶ Iatonna dolona Kamumo unnoton parandangan lino, na iatu langi’ lalan limamMi.

²⁷ Mintu’na to la pa’de, apa iatu Kamu tontong sae lakona; mintu’nato, la buruk susi tamangkale, sia butung misa’ bayu lamba’ la Misondai anna bali’.

²⁸ Apa iatu Kamu tang tileluk len, sia mintu’ taun bilanganMi tae’ upu’na.

²⁹ Mintu’ bati’ taumMi la torro marampa’, sia iatu lanto mimi’na la tontong bantang dio oloMi.