AYUB 40 - Sura' Madatu

Pebali ma’penduanNa PUANG lako Ayub, kumua la napa’petiroan Ayub tu kuasanna 40:1-9

¹ Attu iato napebaliimi PUANG tu Ayub lan mai angin bara’, Nakua:

² Ma’tambeke’ko susito misa’ muane, la Kukutanaiko, ammu pakilalaNa’.

³ Morai dukarokoka untaeran kamalamburangKu, sia umpasalaNa’ la untonganan kalemu?

⁴ Susiraka takia’Na Puang Matua tu takia’mu, sia ma’dinraka tu gamarammu gumaluntu’ susi gamaranNa Puang?

⁵ Beloimi kamala’biran sia kamatandean tu kalemu, pakeimi kadipangkeran sia kakapuan tu kalemu;

⁶ barrakanni tu kasengkean maparrangmu, sia tiroi tu mintu’ matampona, ammu pemparrakanni;

⁷ tiroi tu mintu’ matampona, ammu patundukki sia ta’pa lungganakki tu to tang mekaaluk.

⁸ Buni sola nasangi tu tau iato lan to’ barra’-barra’, pattangi lan to’ kabunianna.

⁹ Iake susito Aku duka la umpudiko, belanna iatu lima kananmu umpapataloko.

Siumpu’na pebali ma’penduanNa PUANG lako Ayub, iamotu umpokada a’ganna darang Nil 40:10-19

¹⁰ Tiroi tu darang Nil, tu mangka Kupadadi susi iko. Ungkande riu susito sapi.

¹¹ Tiroi tu kamawatanganna lan to’ aakna, sia kamabukuanna lan to’ ura’ tambukna!

¹² Nae’te’ tu ikko’na susito kayu arasi’, iatu ura’ pupunna susito ulang dipasiulang.

¹³ Iatu bukunna susito suling tambaga, iatu lesokanna susito batang bassi.

¹⁴ Iamo dioren, tonna pamulai tu panggaraganNa Puang Matua, iamotu pa’padadi Napapa’dangi Puang;

¹⁵ ondongpi iatu mintu’ buntu umpabu’tuanni la nakandena, tu nanii maningo mintu’ olo’-olo’ dao kapadanganna.

¹⁶ Umbambangan kalena diong garonto’ seroda, tu inan narerung tallang-tallang sia mabuka.

¹⁷ Iatu seroda unnonganni, sia natikui ra’de’ dio to’ randan salu’-salu’.

¹⁸ Tiromi, moi anna mandirri’ tongan tu salu, tae’ natipodang len; manaman nasa’ding, moi anna uai tikula’dak-la’dak mongo’ susi salu Yordan umpatu sadangna.

¹⁹ Denraka misa’ tau barani undammakki tu ulunna sia untossokki tu illongna?

Upu’na pebali ma’penduanNa PUANG lako Ayub, iamotu umpokada a’ganna buaya 40:20–41:25

²⁰ Ma’dinraka mukadang pekan langngan tu buaya, ba’tu umpippingi ulang tu lilana?

²¹ Ma’dinraka mutossok ue tu illongna, ba’tu ungkadang parangka sadangna?

²² La mengkamoya-moyaraka lako kalemu, ba’tu la ma’kada masokanraka lako kalemu?

²³ La siallu’rokoka, sia la mupokaunanraka sae lakona?

²⁴ Ma’dinrokoka sipaningo susitu misa’ manuk-manuk bitti’, sia untoresanni anakmu baine?

²⁵ Ma’dinraka to mebale umbalilii susito balukan, sia untaa-taanni to ma’baluk kesok?

²⁶ Ma’dinrokoka umpatossokki doke’-doke’ silele tu kuli’na, sia urrokki doke kadangan ulunna?

²⁷ Paremme’i limammu, kilalai tu kasiboboran – da mutolei umpogau’i to.

²⁸ Manassa la didampa tu pa’rannuanan la untaloi; tatiro manna, anta tibambangmo.