Psalms 84 - Metrical Psalms in Braid Scots 1928 (T.T. Alexander)

psalm LXXXIV (1–7).

¹ Hoo loesome, Lord o’ Hosts, to me Appears Thy Hoose o’ Prayer, And hoo delichtsome sune to be Wi’ them that loe Thee there.

² My saul wi’ langin’ wears awa To win Thy courts to see; O Livin’ God, my hert and a’ That’s in me cries for Thee.

³ The very sparras there hae socht A biggin’ whaur to bide; And e’en the swallow there has bocht A neuk her nest to hide — A neuk in Thine ain altar‐stane, Her birds to bield fu’ snod — O Lord o’ Hosts, that art alane, My Sov’ran and my God.

⁴ Blythe they that bide Thy Hoose athin, And lilt Thy praises aye;

⁵ Blythe they their strength in Thee that fin’ Whause herts loe weel Thy wey.

⁶ As Baca’s dale they wars’le throwe, They mak’ a wa’l therein; The rain, that fills the haughs sae fu’, Skails blessins frae abune.

⁷ And sae frae strength to strength they win Alang the lichtsome road, Until in Zion ilka ane, Stands face to face wi’ God.