Psalms 8 - Metrical Psalms in Braid Scots 1928 (T.T. Alexander)

psalm VIII

¹ Lord o’ us a’, hoo is Thy name On hie exaltit far, That has Thy glory set abune The yontmaist lemin’ star!

² Frae oot the moo’ o’ bairnies sma’ Thou ’stablishit Thy micht, That vengefu’ men and faeman a’ Sood quaten at the sicht.

³ Gin to the lift I heist my e’en — The wark o’ Thine ain haun’ — Whaur mune and starnies a’ are seen, Set there by Thy commaun’;

⁴ Then, what is man, I’m fain to speir, That Thou heeds him ava, Or son o’ man, that Thou sae near To him sood coothy draw?

⁵ For, but a kennin’ laigher Thou Than God himsel’ him made; A croon o’ glory on his broo And gude‐gree Thou has laid.

⁶ Laird owre Thy warks Thou made him be, Put a’ thing ’naith his feet —

⁷ A’ sheep and owsen, ay, and sae The beasts that fend for meat;

⁸ Birds o’ the air, a’ fish whause hame Is in the troghs o’ sea.

⁹ Lord o’ us a’, hoo is Thy name Exaltit up on hie!