Psalms 126 - Metrical Psalms in Braid Scots 1928 (T.T. Alexander)psalm CXXVI 1 When Zion’s thirldom God brocht hame, Like dreamin’ folk were we; 2 Syne to oor moo’ the lauchter came, Oor tongue was liltin’ free. Amang the heathen folk, quo’ they, “God wrocht for them fu’ weel”; 3 God grandly wrocht for us, and sae Richt blythesome may we feel. 4 Like spates that flude the birsl’t lea, God us frae thirldom free’d; 5 Wha saw in dool sal live to see A blythesome hairst succeed. 6 Wha, murnin’ sair, gangs oot to cast Gude seed upon the land, Sal, dootless, blythe win hame at last, Wi’ cornsheaves in his hand. |
Metrical Psalms in Braid Scots, translated by Rev. T. T. Alexander published in 1928. This text is maintained by MissionAssist.
MissionAssist