Psalms 1 - Metrical Psalms in Braid Scots 1928 (T.T. Alexander)

psalm I

¹ O, blessit he, that gangs‐na wi The godless, nor will staun’ ’Mids’ sinfu’ men, nor sit wi’ them That scoff at God’s commaun’;

² But, day and nicht, fin’s his delicht, Aye foremaist abune a’, To ponder lang the thochts amang O’ God’s maist holie Law.

³ A tree that grows, whaur burnie rowes, In hairst‐time frit sal gie; Its leaves sae braw ne’er wilt awa’ — Sae sal the richteous be.

⁴ But godless men can never ken Sic blessin’s; like they are To cauf that’s driv’n by win’s o’ hevin, And skail’d baith near and far.

⁵ In jidgment they, that dinna hae Regaird for God, maun fa’; Nor can they gang, that ettle wrang, Wi’ folk that loe God’s Law.

⁶ Because the wey o’ gude men aye The Lord dis brawly ken; But, shair as ocht, He’ll bring to nocht The gait o’ godless men.