Titus 3 - New Testament in Braid Scots 1904 (William Wye Smith)

CHAPTIR THRIE. Mair directions to Titus; wha seemed to be amang a loose‐tongued folk.

¹ Pit them weel in mind to submit their sels to rulers and authorities: to be obedient, ready to aʼ gude warks.

² No to speak ill oʼ ony; no to be contentious: but cannie, schawin aʼ meekness to aʼ men.

³ For eʼen we, at ae time, war glaikit, dour, deceived, hauden wiʼ mony hankerins and pleasurs, leevin on in malice and envy, wordie to be detestit, and hatin ane‐anither.

⁴ But whan the unco favor and the love oʼ God oor Saviour to man shined oot,

⁵ No by warks oʼ richtousness we had dune oorsels, but by his mercie he savʼt us, throwe the weshin oʼ the new birth, and a makin‐new oʼ us by the Holie Spirit,

⁶ Whilk he teemed‐oot on us wiʼ rowth, throwe Jesus Christ oor Saviour;

⁷ In order that bein declarʼt richtous by his tender‐love, we micht be made heirs, by way oʼ hope, oʼ Eternal Life.

⁸ Faithfuʼ is the word! and oʼ thir things I wad that ye threep strangly, in order that they wha hae believed in God may be carefuʼ to pit their sels forrit in gude warks. Thir things are gude and profitable to men!

⁹ But silly quaistens, and pedigrees, and strifes, and argle‐barglins aboot points oʼ the Law, avoid; for they are fruteless and sapless.

¹⁰ A promoter oʼ factions, eftir a first and second warnin, refuse.

¹¹ Kennin, that siccan a ane has been turned agley oot oʼ the way, and sins; bein condemned oʼ his sel.

¹² At siccan a time as I may send Artemas to ye, or Tychicus, mak aʼ diligence to come to me at Nico?-?polis; for I hae determined to winter yonder.

¹³ Set forrit diligently Zenas the writer, and Apollos, that naething be wantin tae them.

¹⁴ But lat oor folk, as weel, be learnin in gude warks to pit their sels forrit in needfuʼ services; that they be‐na ungratefuʼ.

¹⁵ Aʼ they that are wiʼ me salute ye. Salute ye thae that loʼe us weel iʼ the faith. Tender‐love be wiʼ ye aʼ.