Titus 2 - New Testament in Braid Scots 1904 (William Wye Smith)

CHAPTIR TWA. Hoo Titus soud teach the folk oʼ Crete.

¹ But speak ye the things that conform to the halesome doctrine.

² Auld men to be tentie, grave, douce‐mindit, hale iʼ the faith; in love, in tholin;

³ The auld weemen, iʼ the same way, in demeanor as becomes holie anes; no giean to slander, nor yet to muckle wine made captive; teachers oʼ what is gude;

⁴ That they may lead the young weemen to loʼe their husbands, to loʼe their bairns;

⁵ To be douce‐mindit, pure, workers‐at‐hame, gude, submittin to their ain husbands; least the word oʼ God soud be spoken again.

⁶ The younger men iʼ the same way, chairge ye to be douce‐mindit;

⁷ Anent aʼ things schawin yere ain sel as a paittern oʼ gude warks; in yere instructions, in purity, gravity,

⁸ Halesome speech no to be condemned; that he wha oʼ a contrar mind may be shamed; haein naething ill he can say oʼ us.

⁹ Servants, be biddable to yere ain maisters; in aʼ things pleasin?-?weel, no answerin‐back,

¹⁰ No pilferin, but schawin aʼ gude faith, that they may mak bonnie the doctrine oʼ oor God and Saviour in aʼ things.

¹¹ For the tender‐love oʼ God, wiʼ salvation for aʼ men, has appearʼt,

¹² To the end that denyin oorsels as to ungodliness and warldly fainness, we soud leeve in a douce‐mindit and richtous and godly mainner iʼ the present warld;

¹³ Ready to welcome the blessed hope and shinin‐forth oʼ the glorie oʼ oor great God and Saviour Jesus Christ.

¹⁴ Wha gied himsel for us, that he micht rescue us frae aʼ sin, and mak pure for himsel a people oʼ his ain, fuʼ oʼ zeal in gude warks.

¹⁵ As to thir things, be ye speakin, and entreatin, and repruvin, wiʼ aʼ authority. Lat nae man lichtlie ye!