Titus 1 - New Testament in Braid Scots 1904 (William Wye Smith)

CHAPTIR ANE. Paul, wha left Titus ahint in Crete, sends him mony instructions in his kirk‐wark.

¹ Paul, a servitor oʼ God, and an Apostle oʼ Jesus Christ, conform to the faith oʼ Godʼs bidden anes, and knowledge oʼ the truth, that whilk is conform to godliness,

² In hope oʼ Life‐eternal, that the God wha isna fause promised afore the ages;

³ But has made plain in his ain gude times his word, wiʼ whilk I was lippened, as by the commaun oʼ oor Saviour God,

⁴ To Titus, my true bairn eftir a co‐ordinate faith; tender‐love and peace, frae God oor Faither, and Christ Jesus oor Saviour.

⁵ For this end I left ye ahint in Crete, that the things no yet dune ye micht pit in order, and set Elders in ilka citie, as I gied ye orders.

⁶ Gin ony man is wyteless, the husband oʼ ae wife, haein believin bairns, no wytit wiʼ riot or disobedience.

⁷ For the bishop maun be wyteless, as the steward oʼ God; no set in his ain wull, no sune vexed, no gien to wine, no a striker, no grippie wiʼ siller;

⁸ But hospitable, a freend oʼ what is gude, douce‐mindit, just, holie, airtin weel his sel,

⁹ Keepin sterk haud oʼ the leal word that is conform to the teachin, that he may be able to exhort iʼ the halesome doctrine, and to convince the contendin.

¹⁰ For a hantle are unruly; fuʼ oʼ perfecʼ haivers; deceivers; special they oot oʼ the Circumceesion.

¹¹ As to wham, it is necessar to steek their mouʼs; wha, in sooth, for the sake oʼ siller, are whammlin hail hooses, teachin things they soud‐na.

¹² Says ane frae ʼmang their sels, a prophet oʼ their ain:— “Cretans; aye fause; rampin wild‐beass, idle pock‐puddins!”

¹³ This testimonie is true; for whilk cause repruve them snellie, that they may be hale iʼ the faith.

¹⁴ No takin tent to Jewish tales, and commauns oʼ men wha turn their sels awa frae the truth.

¹⁵ Aʼ things are clean to the clean: but to the unclean and unbelievin is naething clean: but baith their mind and conscience hae become unclean.

¹⁶ God they profess to ken; but iʼ their warks they deny him; bein abominable and dour, and until aʼ gude warks rejeckit.