Romans 8 - New Testament in Braid Scots 1904 (William Wye Smith)

CHAPTIR AUCHT. Paul wins ayont the mirk, into a graun Christian hope!

¹ Sae than, thar is nae condemnation for thae that are in Christ Jesus.

² For the principle oʼ the Spirit oʼ Life in Christ Jesus deliverʼt me frae the principle oʼ sin and death.

³ For, what coudna be by the Law — in that it was feckless throwe oor flesh — God condemned sin iʼ the flesh, in sendin his ain Son iʼ the image oʼ oor flesh, and because oʼ sin.

⁴ That the holy ends oʼ the Law micht be seen in us, wha walk conform to the Spirit, and no conform to the flesh.

⁵ For they wha leeve conform to the flesh, wad raither hae the things oʼ the flesh; but they followin the Spirit, wad hae the things oʼ the Spirit.

⁶ Sae, what the flesh prefers is but death; but what the Spirit prefers, is indeed life and peace.

⁷ For what the flesh prefers is at enmity wiʼ God; seein it disna gie itsel ower to Godʼs law — nor in fact, can it sae dae.

⁸ And they wha hae their bein iʼ the flesh, canna pleasur God.

⁹ But ye haena yere bein iʼ the flesh, but iʼ the Spirit, gin Godʼs Spirit is bidin in ye: but gin ony ane hasna Christʼs Spirit, he isna oʼ his.

¹⁰ But, gin Christ is in ye, the body is deid on accoont oʼ sin, but the Spirit is leevin on accoont oʼ holiness.

¹¹ And gin the Spirit, wha raised up Jesus frae amang the deid, dwalls in ye, he that raised up Christ Jesus frae amang the deid sal eʼen gie life to yere deein bodies, on accoont oʼ his indwallin Spirit in ye.

¹² Sae than, brethren, debtors are we — no to the flesh, conform to the flesh to leeve —

¹³ For, gin conform to the flesh ye are leevin, ye are sure to be deein; but, gin iʼ the Spirit ye are slayin the deeds oʼ the body, ye sal leeve.

¹⁴ For as mony as are airtit by Godʼs Spirit, they are Godʼs bairns.

¹⁵ For ye hadna putten in ye a spirit oʼ slavery, bringin ye back intil dreid; but ye had putten intil ye a spirit oʼ adoption, in whilk we cryʼt oot, “Abba! Faither!”

¹⁶ The Spirit himsel is joint witness wiʼ oor spirit, that we are bairns oʼ God.

¹⁷ But, gin bairns — than heirs as weel! Godʼs heirs, and joint‐heirs wiʼ Christ; gin at least we jointly suffer, that we may be jointly glorifyʼt.

¹⁸ For I coont that what we dree iʼ this present, is no wordie to be mentioned alang wiʼ the glorie to come, whilk is to be made kent throwe us.

¹⁹ For the fain‐lookit‐forrit oʼ the Creation is waitin for the revealin oʼ Godʼs bairns.

²⁰ For to vanity was Creation made subject — no oʼ its ain wull, but by him wha made it subject —

²¹ In hope that the Creation itsel soud be deliverʼt frae the slavery oʼ corruptness, intil the liberty oʼ the glorie oʼ the bairns oʼ God.

²² For we ken that aʼ creation is maenin thegither, and travailin thegither, in bearin‐pangs till noo;

²³ And no only sae; but eʼen we, wha hae the first‐frute oʼ the Spirit, eʼen we oorsels, within oorsels are maenin, fain‐waitin for adoption — the redeemin oʼ oor body.

²⁴ For in hope we are savʼt; but hope beheld isna hope! for what ane sees, why dis he “hope” for?

²⁵ But gin what we see‐na we hope for, than patiently we wait, fain to hae it.

²⁶ And in that vera way, the Spirit is giean us help in oor weakness; for eʼen what we soud be prayin for iʼ the way we soud, we ken‐na; but the Spirit himsel helps oor intercessions, wiʼ fainness oʼ desire no to be utterʼt.

²⁷ And he wha redds oot the heart kens what the Spirit appruves, for it is conform to God he pleads, on behauf oʼ the saunts.

²⁸ But we div ken that to them wha love God, aʼ things work thegither for gude; to thae wha are bidden anes, conform to his purpose.

²⁹ For wham he afore appruved, he afore appointit, conform to the likeness oʼ his Son; that he micht be First‐born oʼ mony brethren.

³⁰ And wham he afore appointit, the same anes he bade; and wham war bidden, the same anes he appruved; and wham he appruved, the same he declarʼt richtous; and wham he declarʼt richtous, the same he made glorious.

³¹ Than what sal we say to thir things? Gin God be on oor side, wha is again us?

³² He wha hained‐na his ain Son, but gied him up for us aʼ, sal he no wiʼ the gift oʼ him, gie us aʼ things in his lovin favor?

³³ Wha sal wyte Godʼs chosen anes? God, wha declares them richtous?

³⁴ Wha condemns? Christ? wha deeʼt (na, wha raither was raised again), wha is at Godʼs richt haun, and pleadin in oor behauf?

³⁵ Wha sal sinder us frae Christʼs love? Sal trouble, or dool, or persecution, or famine, or nakitness, or skaith, or sword?

³⁶ Eʼen as it is putten doon, “For thy sake are we gien ower to death the hail day lang; we are coontit as sheep for the slauchter.”

³⁷ But, in aʼ thir things we are victorious — and mair nor victorious — by him wha loved us.

³⁸ For I am perswadit that no life, and no death, nor Angels, nor heigh pooers,

³⁹ Nor heigh things, nor laigh things, nor ony ither creatit thing, sal hae pooer to sinder us frae Godʼs love, whilk is in Christ Jesus oor Lord!