Romans 6 - New Testament in Braid Scots 1904 (William Wye Smith)

CHAPTIR SAX. Deid to oor auld life in sin; but leevin to the new life in Christ.

¹ What, than, are we to say? Are we to gang on in sin, that mair tender‐love may be seen?

² Awa wiʼ it! Hoo sal we, wha deeʼt to sin, be leevin ony langʼr inʼt?

³ Ken‐ye‐na that aʼ we wha war bapteezʼt intil Jesus Christ, war bapteezʼt intil his death?

⁴ We wiʼ him war buryʼt, than, in oor bapteezin intil his death; sae that eʼen as Christ was raised up frae ʼmang the deid by the glorious pooer oʼ the Faither, sae we in the new life micht walk!

⁵ For, gin we hae been ane wiʼ him iʼ the image oʼ his death, nae doot sae sal we be iʼ the image oʼ his Risin‐again.

⁶ Tak tent oʼ this, that oor auld man was wiʼ him crucifyʼt, sae that the body oʼ sin micht perish, that we soud serʼ sin nae mair.

⁷ For he that has deeʼt, is quat oʼ sin.

⁸ Noo, gin we deeʼt wiʼ Christ, we threep that we sal eʼen leeve wiʼ him;

⁹ Kennin, that Christ, bein raised up frae the deid, dees nae mair: death has nae pooer ower him.

¹⁰ For the death that he deeʼt, he deeʼt to sin ance for aʼ; but noo that he leeves, he leeves to God.

¹¹ And sae you yersels coont yersels as deid to sin, but leevin to God, in Christ Jesus.

¹² Dinna lat sin, than, hae pooer iʼ yere deein body, to gar ye mind its craikin;

¹³ Nor gie ower yere pooers, as instruments oʼ wickedness, to sin; but gie ower yersels to God, as gin leevin frae amang the deid; and yere pooers as instruments oʼ holiness to God.

¹⁴ For sin sal nae mair hae pooer ower ye; for ye are‐na aneath the Law, but aneath Free‐Favor.

¹⁵ And what than? Are we to sin, for that we are‐na aneath the Law, but aneath Free‐Favor? Far frae that!

¹⁶ Div ye no ken, that to the ane ye are giean yersels ower to obey as servants, servants dae ye become to wham ye gie obedience: whether aiblins it be oʼ sin, to death; or obedience, to holiness.

¹⁷ But thanks to God! that haein been Sinʼs servants, ye gied obedience oot oʼ the heart to yon form oʼ lear intil whilk ye war shapit;

¹⁸ And, bein set free frae sin, ye war made into servants to Holiness.

¹⁹ I speak but as a man, for the wauffness oʼ yer flesh; for eʼen as ye gied ower yere pooers as servants to vileness, and lawlessness for lawlessness — sae, noo, gie ower yere pooers as servants to Holiness, for yere perfection!

²⁰ For whan ye war Sinʼs servants, ye had naither airt nor pairt in holiness.

²¹ What frute had ye than, iʼ yon things ye are noo ashamed oʼ? for the end oʼ sic is death!

²² But noo, bein set free frae sin, and made servants to God, ye hae frute to sanctification; and at the lang‐last, Eternal Life!

²³ For the fee oʼ sin is death; but Godʼs gree is Eternal Life, in Jesus Christ, oor Lord!