Romans 4 - New Testament in Braid Scots 1904 (William Wye Smith)

CHAPTIR FOWR. Abrʼam and his faith: whilk we wad do weel to follow.

¹ Whatna than sal we say that Abrʼam oor faither iʼ the flesh has gotten?

² For gin Abraʼm, by his warks, was acceptit as richtous, he had fundation for gloryin: yet no afore God.

³ For what is putten doon iʼ the buik? “Abrʼam lippened God; and it was set doon as richtousness.”

⁴ But to him wha works, the reward isna coontit by way oʼ favor, but by way oʼ debt.

⁵ While to him wha works‐na, but lippens him wha justifies the ungodly — the faith oʼ him is coontit as richtousness.

⁶ Eʼen as Dauvid schaws the weel?-?bein oʼ the man to wham God coonts richtousness, sindry frae warks:

⁷ “Happy they whase ill‐deedinesses are forgiʼen, and whase sins are happit ower!

⁸ “Happy is the man whase sin the Lord disna haud again him!”

⁹ Comes than this blessin on the circumceesion? or on the uncircumceesion as weel? For we are sayin that “faith” was coontit to Abrʼam as “richtousness.”

¹⁰ Hoo than was it coontit? Whan in circumceesion? or in uncircumceesion? No in circumceesion, but in uncircumceesion!

¹¹ And he was gien the sign oʼ circumceesion, a seal oʼ the faith?-?richtousness he had in his uncircumceesion: sae that he micht be the great heid oʼ aʼ wha hae faith while in their uncircumceesion, that richtousness soud be coontit to them;

¹² And the great heid oʼ circumceesion to them wha not only hae circumceesion, but wha follow the steps oʼ oor faither Abrʼam in his uncircumceesion.

¹³ For it wasna throwe the Law that the promise was gien to Abraʼm or to his seed, anent bein the heir oʼ the warld; but throwe the richtousness oʼ faith.

¹⁴ For gin they wha are oʼ “Law” war heirs, “faith” has failed; and the promise has come to nocht!

¹⁵ For the law schaws wrath; but whaur thar is nae law, thar is nae brekin oʼt.

¹⁶ Sae it is oʼ faith, that it may be by favor, in order that the promise may be siccar till aʼ the seed: no to that oʼ the law only, but eke to that oʼ the Abrʼam‐faith, wha is the great heid oʼ us aʼ;

¹⁷ (Eʼen as it is putten doon, “The great heid oʼ mony nations hae I made thee,”) afore God wham he believed: eʼen him wha raises the deid, and caʼs things that are‐na eʼen as gin they war:

¹⁸ Wha, whan hope was gane, on hope held fast, that he micht become faither oʼ mony nations; eʼen as it was spoken, “Sae sal be thy seed!”

¹⁹ And mainteenin strang his faith, he lookit‐na on his ain body as bein deid — bein eʼen aboot a hunner‐year‐auld — nor Sarahʼs womb as deid;

²⁰ But lookin on the promise oʼ God, he becam strang in faith, and switherʼt‐na wiʼ unbelief, giean glorie to God;

²¹ And siccar iʼ the belief that what he had promised he was strang to perform:

²² And sae it was coontit to him for richtousness.

²³ But it wasna for him alane that this was sae coontit to him;

²⁴ But eke for oor sakes, to wham it was to be coontit; to us wha pit oor faith in him wha raised Jesus oor Lord frae the deid;

²⁵ Wha was deliverʼt up for oor sins, and was raised again for oor justifyin.