Romans 3 - New Testament in Braid Scots 1904 (William Wye Smith)

CHAPTIR THRIE. The Law that condemns; and the Gospel that saves.

¹ What way, than, is the Jew heigher? or what gets he oot oʼ his circumceesion?

² Muckle aʼ ways; first this, that they war gien the word oʼ God.

³ For what gin some oʼ them had doots? Sal their doots mak in vain lippenin to God?

⁴ Never! But lat God be true and ilka man a leear; eʼen as it is putten doon, “To the end thy words soud be uphauden, and thou soud prevail whan thou contends.”

⁵ But gin oor wrang maks Godʼs truth shine, what sal we say? Is God wrang wha punishes? — I am speakin as a man:

⁶ Far frae it! Or hoo soud God judge the warld?

⁷ But gin Godʼs truth appeared greater, to his glorie, by reason oʼ my leean, am I ony mair, as a sinner, to be condemned?

⁸ And why no? Juist as some slander us, and report us as sayin, “Lat us do ill, that gude may come!” whase condemnation is richt.

⁹ Weel, what than? Are we beildin oorsels? No the least! for we hae already chairged baith Jews and Greeks oʼ bein aneath sin;

¹⁰ Eʼen as it is putten doon: “Thar is nane holie; na, no ane!

¹¹ “Thar is nane wyss; thar is nane seekin oot God.

¹² “They are aʼ gane a‐gley; they are aʼthegither feckless; thar is nane schawin love, no sae muckle as ane.

¹³ “Their hauss is like an open sheugh; wiʼ their tongues they hae used doobleness; the venom oʼ the asp is aneath their lips.

¹⁴ “Whase mouʼ is fuʼ oʼ bannin and bitternesss.

¹⁵ “Glegg are their feet to spill blude;

¹⁶ “Destroyin and sorrowin are iʼ their way‐gaun;

¹⁷ “And a way‐gaun oʼ peace hae they nevir kent.

¹⁸ “Nae fear oʼ God is afore their een.”

¹⁹ Noo we ken that whatsoeʼer the Law says, it says it to thae that are aneath the Law; sae that ilka mouʼ may be stoppit, and the hail warld may come aneath the judgments oʼ God.

²⁰ Inasmuckle as by warks oʼ Law, sal nae flesh be made richtous in his sicht; for throwe the Law is the unveilin oʼ sin.

²¹ But noo, aʼthegither sindry frae the Law, a richtousness oʼ God has been set forth, bein uphauden by the Law and the prophets;

²² Eʼen a richtousness oʼ God throwe faith in Jesus Christ, comin to aʼ wha hae faith; for aʼ are ane;

²³ For aʼ hae sinned, and aʼ fail oʼ the glorie oʼ God;

²⁴ Bein held richtous, freely, throwe his ain favor, by the redeemin oʼ Christ Jesus:

²⁵ Wham God sut forth as oor coverin‐ower, by faith in his blude; for the settin forth oʼ his richtousness to the passin‐by oʼ oor auld sins,

²⁶ To schaw the gudeness oʼ God, in his tholin at this time; to the end he micht be richtous his sel, while declarin richtous the man wha believes in Jesus.

²⁷ Whaur comes in gloryin, than? It is putten awa! On whatna principle? Oʼ warks? Nay! But throwe the principle oʼ faith.

²⁸ We are reckonin, than, that a man is held richtous by faith, sindry frae the warks oʼ the Law.

²⁹ Or, is God the God oʼ Jews only? no oʼ the Nations as weel? Aye! eke oʼ the Nations!

³⁰ Gin at least he be the God, wha wull justify the circumceesion for their faith, and the uncircumceesion by like faith!

³¹ Are we, than, makin the Law naething? No sae! On the contrar, we are makin siccar the Law.