Romans 2 - New Testament in Braid Scots 1904 (William Wye Smith)

CHAPTIR TWA. Godʼs even‐handit justice, to Jew and Gentile alike: ae law and ae judgment for aʼ.

¹ Sae, ye are eʼen wantin aʼ excuse, O man! whasaever ye may be, that are condemnin; for whaur ye are condemnin anither, ye are condemnin yersel; for ye wha are wytin are siclike doin.

² But we ken that the judgment oʼ God is true, on thae practeesin sic things as thir.

³ And are ye lippenin to this, O man! wha are condemnin thae that practeese sic things as thir, and yet are doin them, that ye sal escape the judgment oʼ God?

⁴ Or, dae ye licthlie the unco kindness, and forbearin, and lang‐tholin oʼ God; no takin tent that Godʼs gudeness wad fain lead ye to repentance?

⁵ But, wiʼ yere dour and unrepentin heart, ye are heapin up for yersel wrath in wrathʼs day, and the schawin‐forth oʼ Godʼs richtous condemnation:

⁶ Wha will gie to ilk ane eʼen as his warks sal be;

⁷ To thae, on the ae‐haun, wha by patient continuin in gude warks, seek for glorie, honor, and immortality — life eternal:

⁸ To thae, on the ither haun, wha contend, and follow‐na the truth, but follow ill — anger and wrath.

⁹ Dool and pain on ilka manʼs saul wha works oot ocht that is ill, baith to the Jew first, and eke to the Greek:

¹⁰ But glorie, and honor, and peace, to ilka ane wha dis that whilk is gude; baith to the Jews first, and eke to the Greek.

¹¹ For thar is nae walin‐oot oʼ faces wiʼ God!

¹² For as mony as hae sinned, wantin the law, sal eke perish wantin the law; and as mony as hae sinned aneath the law, sal be condemned aneath the law.

¹³ For it isna thae that hear the law that staun richt wiʼ God; but thae wha do the law sal be appruvʼd.

¹⁴ For whan fremʼd folk, thae wha hae nae law, do by natur the warks oʼ the law — thir, wantin the law, are to thirsels a law:

¹⁵ Wha in vera deed gie prufe oʼ the lawʼs wark, whilk is graven on their hearts; their conscience giean testimonie in their thochts, by excusin or else wytin them,

¹⁶ In the day whan God sal judge aʼ the secrets oʼ men, throwe Jesus Christ, eʼen accordin to my joyfu‐message.

¹⁷ But if ye, caʼin yersel a “Jew,” staun on “Law,” and boast in God,

¹⁸ And ken his wull, and appruve the best things, and hae yere lear iʼ the Law,

¹⁹ And are perswadit that ye are yersel a leader oʼ blinʼ anes, a licht to aʼ iʼ the mirk,

²⁰ A guide for ignorant anes, a teacher oʼ bairns, haein the shapin oʼ lear and truth in the Law:

²¹ Ye, than, that tell anither! why dae‐ye‐na tell yersel? Ye that are sayin, “Ane soudna steal!” dae ye steal?

²² Ye that bid men no to commit adultery; dae ye commit adultery? Ye that scunner at eidols, dae ye rob the temples?

²³ Ye that hae yere boast iʼ the “Law,” dae ye brek the Law, and dishonor God?

²⁴ For the name oʼ God, on yere accoont, is dishonored amang the nations; eʼen as it has been putten‐doon.

²⁵ For, on the ae‐haun, circumceesion is a gain, gin ye are keepin the Law; but, on the ither haun, gin ye be a breker oʼ the Law, than yere circumceesion has come to be uncircumceesion!

²⁶ Gin aiblins then, the uncircumceesed keep the holie biddens oʼ the Law, winna the uncircumceesion be coontit as circumceesion?

²⁷ And the uncircumceesion oʼ natur, gin it cairries oot the Law, sal condemn you, wha wiʼ the letter and circumceesion, brek throwe the law!

²⁸ For he isna the “Jew,” wha is but ane ootwardly; nor is circumceesion whilk is seen iʼ the flesh, the “Circumceesion!”

²⁹ But he is the “Jew” wha is ane within; and true circumceesion is the circumceesion oʼ the heart — in spirit, no in name, whase acceptance isna oʼ men, but oʼ God.