Romans 16 - New Testament in Braid Scots 1904 (William Wye Smith)

CHAPTIR SAXTEEN. Salutations and weel‐wishins oʼ Paul.

¹ Forby, I commend tʼye Phebe oor sister, as bein ane that serʼs the kirk in Cenchrea,

² That ye may gie her a welcome iʼ the Lord, wordie oʼ saunts, and may uphaud her whaur she may hae need oʼ ye; for eʼen she hersel up?-?haudit mony, and me mysel.

³ Salute ye Prisca and Aquila, my marrows in Christ Jesus;

⁴ Wha for my life offerʼt their ain necks; to wham no only I gie praise, but aʼ the kirks oʼ the Gentiles.

⁵ And salute the gaitherin iʼ their hoose. Salute Epanetus, my dear ane, wha is first frute oʼ the Province oʼ Achaia to Christ.

⁶ Salute Mary, wha wrocht muckle for us.

⁷ Salute Andronicus, and Junias, my kin, and my fellow‐captives, wha are notit amang the Apostles; wha indeed war in Christ suner than myselʼ.

⁸ Salute Ampliatus, a dear ane in the Lord.

⁹ Salute Urban, oor comrade in Christ, and Stachys my beloved.

¹⁰ Salute Apelles, ane appruvʼd oʼ Christ. Salute thae oʼ Aristobulusʼ family.

¹¹ Salute Herodian, my kinsman. Salute thae oʼ the family oʼ Narcissus, that are in the Lord.

¹² Salute Tryphena and Tryphosa, wha toil in the Lord. Salute Persis, the weel‐loved ane, wha indeed toiled muckle in the Lord.

¹³ Salute Rufus, chosen oʼ the Lord, and his (and my) mither.

¹⁴ Salute Asyncritus, Phlegon, Hermes, Patrobas, Hermas, and the brethren wiʼ them.

¹⁵ Salute Philologus and Julias, Nereus and his sister, and Olympas, and aʼ the saunts wiʼ them.

¹⁶ Salute ane anither wiʼ a sacred kiss. Aʼ the kirks oʼ Christ salute you.

¹⁷ But I entreat ye, brethren, to tak tent oʼ thae that mak the diveesions and offences, contrar to the lear ye war learned, and turn awa frae them.

¹⁸ For sic as thir ser‐na our Lord Jesus Christ, but their ain wame; and, by their fleechin words and flatterin speeches, deceive simple aefauld hearts.

¹⁹ For yere obedience has come to be kent oʼ aʼ; ower you, than, I rejoice; but I wad hae ye to be wyss to that whilk is gude, and innocent oʼ that whilk is ill.

²⁰ But the God oʼ peace sal ding Sautan aneath yere feet sune! The tender‐love oʼ oor Lord Jesus Christ be wʼye!

²¹ Timothy, my marrow, salutes ye, and Lucius, and Jason, and Sosipater my kinsmen.

²² I, Tertius, wha penned this Epistle, salute ye iʼ the Lord.

²³ Gaius, the enterteener oʼ mysel and oʼ the hail kirk, salutes ye. Erastus the City Treasurer salutes ye; and Quartus oor brither.

²⁴ The kindly love oʼ oor Lord Jesus Christ wiʼ ye aʼ! Amen!

²⁵ Noo to him wha has pooer to dar ye siccarlie staun, conform to my Joyfuʼ‐message, eʼen the preachin oʼ Jesus Christ, accordin to the revealin oʼ the mystery, in by‐gane ages keepit close,

²⁶ But is make kent e‐noo, throwe the prophecies oʼ the Scripturs, conform to the wull oʼ the everlastin God, until obedience oʼ faith, to aʼ the nations made plain,

²⁷ To the only wyss God, throwe Jesus Christ — to him be glory, for ever mair! Amen.