Romans 15 - New Testament in Braid Scots 1904 (William Wye Smith)

CHAPTIR FYFTEEN. Jews and Gentiles aʼ to ʼgree. Paulʼs labor and success.

¹ We that are strang soud be cairrying the burdens oʼ thae that are‐na strang, and no be pleasin oorsels:

² But ilk ane pleasur his neebor in that whilk is gude, wiʼ a view to his strenthenin.

³ For eʼen Christ pleased‐na himsel; but as it is putten doon, “The ill‐words oʼ thae that ill‐caʼd thee fell on me!”

⁴ For as mony things as war putten doon afore‐haun, war putten doon for oor lear, that throwe tholin and the consolation oʼ the Scripturs we soud hae hope.

⁵ Noo the God oʼ aʼ tholin and consolation gie ye to tak tent to the same thing ane wiʼ anither, accordin to Jesus Christ.

⁶ Sae that, wiʼ ae mind, and ae voice, ye may be magnifyin the God and Faither oʼ oor Lord Jesus Christ.

⁷ And sae help ye ane anither, eʼen as Christ helpit you, to Godʼs glorie.

⁸ For I threep that Christ becam a servant oʼ circumceesion, in behauf oʼ the truth oʼ God, that he micht mak siccar the promises gien to the faithers.

⁹ That the nations, on the ither haun, micht magnify God for his mercie; eʼen as it is putten doon: “For this cause wull I confess to thee amang the nations; and to thy name wull I sing psalms.”

¹⁰ And again he says: “Be joyfuʼ, ye nations, wiʼ his folk!”

¹¹ And ance mair: “Gie ye praise, aʼ ye nations, to the Lord! and dwall on his praises, aʼ ye folk!”

¹² And again, Esaiah says, “A rute sal thar be oʼ Jesse; and he wha is risin to rule the nations: on him sal the nations hope.”

¹³ Noo the God oʼ hope fill ye wiʼ aʼ joy and peace in believin, to the end ye may hae rowth oʼ hope, and pooer oʼ the Holie Spirit.

¹⁴ And I mysel, my brethren, am become perswadit oʼ ye, that ye yersels are filled wiʼ gudeness, fuʼ oʼ aʼ knowledge, and fit to coonsel ane anither.

¹⁵ Nane‐the‐less, I wrate the mair bauldly in pairt to ye, steerin up yere memories, because oʼ the favor oʼ God gien to me.

¹⁶ To the end I soud be a public servant oʼ Jesus Christ to the nations, giean service in the Joyfuʼ‐message oʼ God, that the offeran oʼ the nations micht be weel‐pleasin, made holie by the Holie Spirit.

¹⁷ I hae, than, the roosin oʼ mysel in Christ Jesus, as to the things oʼ God;

¹⁸ For I winna daur to speak oʼ deeds whilk Christ wrocht‐na oot for himsel by me, to the obeyin oʼ the nations, in word and deed:

¹⁹ In rowth aʼ signs and ferlies, in pooer oʼ the Holy Spirit, sae that I frae Jerusalem and in a great sweep the lenth oʼ Illyricum, hae deliverʼt fully the Joyfuʼ‐message oʼ Christ.

²⁰ But in sic mainner am I strivin to preach the Joyfuʼ‐message — no whaur Christʼs name was kent; that I bigg‐na on anitherʼs foundation;

²¹ But, eʼen as it is putten doon: “They that warna tellʼt aboot him sal see; and they wha hae‐na heard sal understaun.”

²² For whilk thing I was, a gey wheen times, hinderʼt frae coming to ye;

²³ But noo, haein nae mair place in thir pairts, and haein a strang desirin a gude wheen year to see ye,

²⁴ Whaneʼer I micht be gaun intil Spain, I am in hope, whan gaun throwe, to see ye, and by you to be sutten forrit on the way, gin aiblins wiʼ you first I am in pairt satisfeeʼt.

²⁵ But e‐noo I am gaun to Jerusalem, to serʼ the saunts.

²⁶ For Macedonia and Achaia war weel‐pleased to mak a certain gift for the poortith oʼ the saunts at Jerusalem.

²⁷ They war sae pleased — and their debtors are they. For, gin in their spiritual things the Gentiles had a share — they soud iʼ their temporal things share wiʼ them.

²⁸ Haein than completit this, and haein made siccar to them this frute, I wull come back, by you, to Spain.

²⁹ I ken too, that whan I dae come, I sal come iʼ the abundance oʼ the blessin oʼ Christ.

³⁰ But I entreat ye, brethren, throwe oor Lord Jesus Christ, and the love oʼ the Spirit, to warsle thegither wiʼ me, in prayers for me, to God;

³¹ That I may be rescued frae the unbelievin in Judea; and that my service for Jerusalem may be acceptable to the saunts:

³² And that joyfully I may come tʼye, throwe Godʼs wull, and may be refreshed wiʼ you aʼ.

³³ Noo the God oʼ aʼ peace be wʼye aʼ. Amen!