Romans 14 - New Testament in Braid Scots 1904 (William Wye Smith)

CHAPTIR FOWRTEEN. The eatin oʼ meat, and the keepin oʼ days: see ye that it is dune for the sake oʼ the Lord, and no for the sake oʼ contention!

¹ And forby: ane that is weak iʼ the faith tak ye in, and no for the sake oʼ doots and disputes.

² Ane, indeed, in his faith can eat aʼ things; anither, wha is weak, eats what is vegetable.

³ Lat‐na the eatin ane despise him that eats‐na; and lat‐na him that eats‐na condemn him that eats; for God receives him.

⁴ Wha are ye that are judgin a fremʼd aneʼs servant? he sall staun or faʼ till his ain maister; but he sal be made to staun; for God is strang to up‐haud him.

⁵ Ane, indeed, thinks mair oʼ ae day nor anither; whauras anither thinks muckle oʼ ilka day — lat ilk ane be well‐perswadit in his ain mind.

⁶ He that regairds the day, regairds it to the Lord; and he that eats, eats to the Lord, for he gies thanks to God: and he that eats‐na, to the Lord he absteens, and gies thanks to God.

⁷ For no ane oʼ us leeves to his ain sel; and no ane oʼ us dees to his ain sel.

⁸ For baith, gin aiblins we leeve, we leeve to the Lord; and gin aiblins we dee, we dee to the Lord; sae than, gif we leeve, or gif we dee, we are the Lordʼs.

⁹ For, ettlin thus, Christ baith deeʼt and raise again, that he micht hae the lordship ower the deid and the leevin.

¹⁰ But ye, why soud ye condemn yere brither? Or ye, why soud ye lichtlie yere brither? For we sal aʼ present oorsels at Godʼs Judgment‐seat.

¹¹ For it is putten‐doon: “As I leeve, says the Lord, ‘To me sal lout ilka knee, and to God sal ilka tongue confess!’ ”

¹² And sae ilka ane oʼ us sal for himsel gie an account to God.

¹³ Sae, nae mair lat us be judgin ane anither, but this discern ye raither — no to pit a stumblin‐clog afore yere brither; or a girn.

¹⁴ I ken, and hae become perswadit by the Lord Jesus, that naething is unclean oʼ itsel; only till him wha is reckonin onything to be unclean, till him it bude be unclean.

¹⁵ Noo, gif ower your meat yere brither is grieved — nae mair are ye gangin in love — dinna wiʼ yere eatin destroy that ane for wham Christ deeʼt!

¹⁶ Lat na yere gude be ill‐spoken oʼ.

¹⁷ For Godʼs kingdom isna eatin and drinkin, but holiness and peace, and rejoicin in Holie Spirit.

¹⁸ For ane that is sae doin service to Christ, is weel‐pleasin to God, and acceptit oʼ men.

¹⁹ The things oʼ peace, than, are we pursuin; and the things that are for oor common up‐biggin.

²⁰ For the sake oʼ meat, be‐na undoin Godʼs wark. Aʼ things, indeed, are clean; but it is ill for the man wha eats wiʼ cause oʼ stumblin.

²¹ It is a grand thing no to eat flesh, nor to drink wine, nor to do onything whaurin yere brither is gart to stumble, or is snared, or is made feckless.

²² And ye, what faith ye hae, hae it to yersel afore God! Weel is he wha condemns‐na his ain sel in what he appruves.

²³ But he that maks a distinction atween meats is condemned gif he eat, for it wasna oʼ faith; for what isna oʼ faith is sin.