Romans 13 - New Testament in Braid Scots 1904 (William Wye Smith)

CHAPTIR THIRTEEN. The saunt is a gude citizen; and walks iʼ the licht.

¹ Lat ilka saul submit itsel to the protection oʼ the public authoritie. For thar is nae authoritie but by God; thae existin, exist by God.

² Sae he that sets his sel again the authoritie sets his sel again the ordinance oʼ God: and they that oppose sal receive condemnation.

³ For rulers are‐na a fear to gude warks, but to the ill. But wad ye no be fleyʼt oʼ the authoritie? Dae ye that whilk is gude, and ye sal hae praise oʼ the same.

⁴ For he is Godʼs servant tʼye, for that whilk is gude. But gin aiblins ye are doin ill, hae fear; for he disna cairry the sword for nocht. For Godʼs servant is he, punishin wiʼ wrath him wha practeeses ill.

⁵ And sae thar is a need oʼ submittin yersels, no only on accoont oʼ the wrath, but eke on accoont oʼ conscience.

⁶ For sae pey ye tribute as weel: for Godʼs ceevil servants are they, takin tent to this vera thing.

⁷ Render, than, to aʼ their dues; tribute to wham tribute; tax to wham tax; fear to wham fear; honor to wham honor.

⁸ Awe nae man ocht, save love to ane anither; for he wha loʼes the ither fills up the Law.

⁹ Thus: “Ye canna commit adultery; Ye sanna commit murder; Ye sanna steal; Ye sanna covet”; and gin thar be ony ither commandment, it is summed up iʼ this word, namely: “Ye sal loʼe yere neebor as yer sel!”

¹⁰ Love to aneʼs neebor works nae ill; love tharfor, is the pith oʼ the Law.

¹¹ And, kennin the time, that it is an ʼoor eʼen noo for us to wauken oot oʼ sleep: for noo is oor salvation narer‐haun than whan we first believed:

¹² The nicht is far gane; the dawin comes on. Pit we awa, than, the warks oʼ darkness, and lat us tak the wapins oʼ licht!

¹³ Lat us work, honorably, as in the licht oʼ day: no in bruilzies and druckenness, no in lewdness and wantonness, no in castins‐oot and envyin.

¹⁴ But pit ye on the Lord Jesus Christ; and hae nae trokin wiʼ the flesh and its corrupt desires.