Romans 12 - New Testament in Braid Scots 1904 (William Wye Smith)

CHAPTIR TWALʼ. Christʼs folk maun do as Christ dis; the warld is lookin on!

¹ I entreat ye, than, brethren, by the mercies oʼ God, that ye render yersels as a leevin, holie, weel‐pleasin offeran to God — a proper, rational service.

² And no to be conform to this warld, but to be transformed by the renewin oʼ yere mind, that ye may pit to the prufe what is Godʼs gude, and perfete, and acceptable wull.

³ For, say I, by the favor gien to me, to ilka ane amang ye, no to be thinkin ower muckle oʼ his sel, ayont what he soud think oʼ his sel, but to think oʼ his sel discreetly; eʼen as God gied to ilka ane his portion oʼ faith.

⁴ For, eʼen as in ae body we hae mony pairts, but aʼ oʼ the pairts hae?-?na the same duty,

⁵ Sae we, the mony, are aʼ ae body in Christ; but allenarlie are pairts ane oʼ anither.

⁶ Noo, haein gifts by favor, and gifts differan accordin to the favor gien to us — gin it be prophecie, lat it be iʼ the proportion oʼ faith;

⁷ Or service, iʼ the service; or he that teaches, iʼ the teachin;

⁸ Or an exhorter, iʼ the exhortin: he wha gies, lat him gie in aefauldness; he that leads, to lead tentilie; he that schaws mercie, to do it blythely.

⁹ Love withoot hypocrisy, scunnerin at aʼ that is evil; haudin fast to aʼ that is gude.

¹⁰ In britherly love schaw tender affection ane to anither; in giean honor, surpassin ane anither.

¹¹ In yere actions no slothfuʼ; in yere spirit fervent; to the Lord fuʼ oʼ service;

¹² In hope rejoicin; in trouble lang‐tholin; in prayer perseverin;

¹³ Wiʼ the needs oʼ saunts haein fellowship; in hospitality aye active.

¹⁴ Gie blessins to persecutors — blessins, and no curses.

¹⁵ Rejoice wiʼ the rejoicin, and greet wiʼ the tearfuʼ.

¹⁶ Ilk ane to anither seek the same thing; no seekin heigh things, but forgatherin wiʼ lowly things. Be‐na wyss iʼ yere ain conceit.

¹⁷ Return ill for ill to nane; provide things honorable afore aʼ men.

¹⁸ Gin it be possible, as far as it lies in you, wiʼ aʼ men be at peace.

¹⁹ No seekin vengeance, beloved; but gie place to angʼer; for it is putten doon, “To me belangs vengeance; I wull repay, says the Lord.

²⁰ “Gin yere enemy hungʼer, feed him; gin he be drouthie, gie him drink; for, sae doin, ye sal heap coals oʼ fire on his heid.”

²¹ Be‐na owercome wiʼ ill; but owercome ye ill wiʼ gude.