Romans 11 - New Testament in Braid Scots 1904 (William Wye Smith)

CHAPTIR ELEEVEN. Israʼl cuttit aff for want oʼ faith: but faith can graft them in again.

¹ I speir than, Has God cuisʼen awa his folk? Far frae it! I mysel am an Israʼlite, oʼ Abraʼmʼs seed, oʼ Benjaminʼs tribe.

² God disna cast awa his folk he had afore appruvʼd. Wat ye na — anent Elijah — what the Scriptur says, as he pled wiʼ God again Israʼl?

³ “Lord! thy prophets hae they slain; and thy altars hae they dung doon; and I am left allenar; and they seek for my life!”

⁴ But what says the answer to him? “I hae keepit for mysel seeven thoosand men, wha hae‐na loutit a knee to Baal!”

⁵ Sae than, eʼen at this present, thar is a wee wheen left, by way oʼ a favorin choice.

⁶ But gin it be by favor, it is nae mair oʼ warks; else the favor isna favor.

⁷ Weel, what? That whilk Isʼral socht eftir, the same they forgatherʼt?-?na wiʼ; but the chosen anes forgatherʼt wiʼt; whauras the lave war blearʼt, and saw na.

⁸ Eʼen as it is putten doon: “God gae them a spirit that was sleeperie; een that they see‐na wiʼ, and lugs they hear‐na wiʼ, till this vera day.”

⁹ And Dauvid says, “Be their buird a snare, and a girn, and a stumbling, and an ill‐return to them!

¹⁰ “Be their een blearʼt, that they may‐na see; and their back be aye loutit doon!”

¹¹ But I say, Stumblʼt they to the end they micht faʼ? Far frae it! But throwe the ill‐daen oʼ them, salvation cam to the nations, to steer them up to be jealous.

¹² And noo, gin their ill‐daen was like muckle gear to the warld, and their loss like muckle gear to the nations — hoo muckle mair their abundance?

¹³ But to you am I sayin this — you oʼ the nations; inasmuckle as I am an Apostle to the nations; my office I mak muckle oʼ.

¹⁴ Gin, by ony means, I may steer up to be jealous my ain flesh, and save some frae ʼmang them.

¹⁵ For, gin the castin‐awa oʼ them was a warldʼs bringin‐in, what sal the acceptin oʼ them be but like life frae the deid?

¹⁶ And gin the first frute was holie, the book oʼt maun be holie as weel; and gin the rute was holie, eʼen sae the branches.

¹⁷ And gin some oʼ the branches war taʼen awa — while ye (bein a wild olive) war graftit in amang them — and was made wiʼ them to share oʼ the rute — oʼ the fatness oʼ the olive —

¹⁸ Haud‐na yere heid aboon the branches! But gin ye boast, ken that ye bear‐na the rute, but the rute you!

¹⁹ Ye may say, “The branches war taen awa, that I micht be graftit in!”

²⁰ Weel! throwe their want oʼ faith they war broken; and ye by yere faith are staunin: look‐na at lofty things, but hae fear!

²¹ For gin God spared‐na the nateral branches, tak tent that he spare‐na you!

²² Gie tent, than, to Godʼs kindness and rigor; upon thae that fell, rigor; but upon you Godʼs kindness, gin aiblins ye bide aye in the kindness: else eʼen ye sal be cuttit oot.

²³ And eʼen they (except aiblins they still bide in their lack oʼ faith) sal be graftit in; for God can graft them in again.

²⁴ For gin ye war cuttit‐oot frae the nateral wild‐olive, and, ayont natur war graftit intil a gude olive! hoo muckle mair sal thir, the nateral branches, be graftit intil their ain olive tree!

²⁵ For I wadna hae ye no to ken this mystery, brethren, least ye be ower wyss in yere ain een, that a bleartness to a degree has come on Israʼl, till the abundance oʼ the nations sal come in:

²⁶ And sae, aʼ Israʼl sal be saved; eʼen as it is putten doon, “The Deliverer sal come oot oʼ Zion; he wull pit awa the ungodliness oʼ Jaucob!

²⁷ “And this is my covenant wiʼ them, iʼ the day that I tak awa their sins.”

²⁸ Anent the Joyfuʼ‐message, they are contrar tʼye; but as to the Choosʼn, they are weel looed for the faithersʼ sake.

²⁹ God never rues his biddin or his gifts!

³⁰ For eʼen as ye war at ae time dour toward God, but at this time hae gotten mercie by their dourness;

³¹ Sae, thir war dour, that by yere mercie they too may win mercie.

³² For God has coontit them aʼ dour, that he soud hae mercie on them aʼ.

³³ O, deepness oʼ Godʼs riches, and wisdom, and knowledge! hoo unfathomable his judgments! and his ways unsearchable!

³⁴ “For wha kent the Lordʼs mind? or wha becam his coonsellor?”

³⁵ Or wha first gied to him, and has it returned again?

³⁶ For, by him, and throwe him, and for him, are aʼ things! To him glorie for aye! Amen!