Romans 1 - New Testament in Braid Scots 1904 (William Wye Smith)

CHAPTIR ANE. The heathen soud ken mair oʼ God than they div. Their unco vileness and thrawartness.

¹ Paul, a servitor oʼ Christ Jesus, a bidden Apostle, sutten apairt to Godʼs Joyfuʼ‐message,

² Whilk he promised afore, throwe his prophets iʼ the holie writins,

³ Anent his Son, wha cam oʼ Dauvidʼs seed by the flesh,

⁴ Wha was owned to be Godʼs Son wiʼ micht, eʼen as to the Spirit oʼ Holiness, by a Risin‐frae‐the‐deid — Jesus Christ oor Lord:

⁵ By wham we had gien till us tender love and Apostleship, toward lealness oʼ faith in aʼ nations, for his nameʼs sake:

⁶ Oʼ wham are ye, as weel; bidden anes oʼ Jesus Christ;

⁷ To aʼ thae that are in Rome, Godʼs beloved, bidden saunts; tender love till ye, and peace, frae God oor Faither, and the Lord Jesus Christ!

⁸ First, I am giean thanks to my God, by Jesus Christ, anent ye aʼ for that yere faith is made mention oʼ in aʼ the warld.

⁹ For God is witness for me, him that I serʼ in my spirit, iʼ the Joyfuʼ‐message oʼ his Son, hoo constantly I am speakin oʼ ye;

¹⁰ Aye in my prayers makin request, gin that by some means, eʼen noo at ony time I soud see a gate to gang, wiʼ the wull oʼ God, till ye.

¹¹ For I am fain to see you, that I may gie some spirit‐gift tʼye, that ye may be made siccar;

¹² That is, that we may hae a comfortin thegither by oor common faith — yours and mine.

¹³ But I wadna ye war misleared, brethren, hoo that aft I ettled to come tʼye — but was hinderʼt, eʼen till noo — that I micht hae some frute amang you, eʼen as amang the lave oʼ the nations.

¹⁴ Baith to Greeks and barbarians, baith to wyss and simple, am I debtor:

¹⁵ Thus am I sae fain to gie oot the Joyfuʼ‐message, eʼen to you, that are in Rome.

¹⁶ For I am na blate anent the Joyfu‐message; for it is Godʼs pooer to save ilka ane wha lippens; first to the Jew, and eke to the Greek.

¹⁷ For the richtousness oʼ God, throwe faith, to thae that hae faith, is thus made plain, eʼen as it is putten doon, “The just sal leeve by faith.”

¹⁸ For Godʼs wrath is made kent frae Heeven, again aʼ ungodliness and wickedness oʼ men, wha in wickedness haud the truth under:

¹⁹ Inasmuckle as that whilk may be kent oʼ God is made plain amang them; for God has made it kenspeckle.

²⁰ For the invisible things oʼ him, eʼen frae the warldʼs creation, are made plain to be seen by the things that are creatit — eʼen his eternal pooer and Godheid; that they micht hae nae excuse:

²¹ For, comin to ken God, they magnifyʼt him‐na as God, nor gied him thanks; but their reasons war feckless, and their doitit heart was mirk.

²² Settin‐up to be wyss, they becam fules;

²³ And changin, they tint the glorie oʼ the incorruptible God in the form oʼ an image oʼ corruptible man, and birds, and fowr‐fittit beass, and crawlin things.

²⁴ Sae God eʼen gied them ower to vileness, iʼ the uncleanness oʼ their hearts; sae as eʼen to dishonour their ain bodies amang theirsels:

²⁵ Wha trokit awa Godʼs truth for a lee, and gied worship and service to what is made, raither than to the Maker — wha is blessed for aye; Amen!

²⁶ Sae for this, God gied them up to vile passions; for eʼen their weemen did change the natʼral use for what is contrar to natur;

²⁷ And eʼen sae the men, quattin the wumman, burned wiʼ desire ane to anither; men wiʼ men actin unseemly, and receivin in theirsels the reward oʼ their error as was due.

²⁸ And eʼen as they didna seek to keep God iʼ their mind, God gied them ower to a reprobate heart, to do things no fittin:

²⁹ Bein fuʼ oʼ aʼ unholiness, wickedness, selliness, malignity; fuʼ oʼ envie, blude, strife; twa‐faced; spitefuʼ; tale‐pyets;

³⁰ Backbiters, haters oʼ God, insolent, liftit‐up, boasters, inventors oʼ ill, risin up again parents,

³¹ Wantin sense, breckers oʼ covenants, wantin natʼral affection, wantin kindness;

³² Wha, kennin the holie sentence oʼ God, that they wha dae sic things are wordie oʼ death, no alane dae them, but are colleaguin wiʼ thae that sae practeese.