Revelation 7 - New Testament in Braid Scots 1904 (William Wye Smith)

CHAPTIR SEEVEN. The Saunts are sealed: “Wha are they in white attire?”

¹ Eftir thir things I saw fowr Angels staunin on the fowr corners oʼ the yirth, haudin siccar the fowr wins oʼ the yirth, that nae winʼ soud blaw on the yirth, or on the sea, or on ony tree.

² And I saw anither Angel come up frae the sunrisin, haein the seal oʼ the leevin God, and he cryʼt oot wiʼ a soondin voice to the fowr Angels to wham it was gien to bring skaith on the yirth and the sea,

³ Sayin, “Ye maunna skaith the yirth, nor the sea, nor the trees, to we hae sealʼt the servants oʼ oor God on their broos.”

⁴ And I heard the number oʼ thae sealʼt: a hunner and forty‐fowr thoosand; sealʼt oot oʼ every tribe oʼ the sons oʼ Israʼl.

⁵ Oot oʼ Judahʼs tribe, twalʼ thoosand sealʼt; oot oʼ Reubenʼs tribe, twalʼ thoosand; oot oʼ Gadʼs tribe, twalʼ thoosand;

⁶ Oot oʼ Asherʼs tribe, twalʼ thoosand; oot oʼ Naphaliʼs tribe, twalʼ thoosand; oot oʼ Manassehʼs tribe, twalʼ thoosand.

⁷ Oot oʼ Simeonʼs tribe, twalʼ thoosand; oot oʼ Leviʼs tribe, twalʼ thoosand; oot oʼ Issacharʼs tribe, twalʼ thoosand;

⁸ Oot oʼ Zabulonʼs tribe, twalʼ thoosand; oot oʼ Josephʼs tribe, twalʼ thoosand; oot oʼ Benjaminʼs tribe, twalʼ thoosand sealʼt.

⁹ Eftir this I lookit, and see! an unco number, that nae man could tell, oot oʼ aʼ nations and kith, and folk, and speech, stude afore the Thron, and fornent the Lamb, dinkʼt in white, wiʼ palms iʼ their hauns.

¹⁰ And cryʼt oot heigh, “Salvation to oor God, wha sits on the Thron, and to the Lamb!”

¹¹ And aʼ the Angels war stannin iʼ the compass oʼ the Thron, and roond‐aboot the Elders and the fowr leevin‐anes; and fell doon afore the Thron on their faces, worshippin God,

¹² And quoʼ they, “Eʼen sae: Blessin, and glorie, and wisdom, and giean oʼ thanks, and honour, and pooer, and micht be to oor God, for evir and evir mair!”

¹³ And ane oʼ the Elders answerʼt, and quoʼ he tae me, “Wha are thir, buskit aʼ in white? and whaur cam they frae?”

¹⁴ And quoʼ I tae him, “My lord, ye ken!” And quoʼ he tae me, “Thir are the anes that cam oot oʼ sair and unco tossins‐aboot, and hae made their cleedin white iʼ the blude oʼ the Lamb.

¹⁵ “Sae are they iʼ the presence oʼ the Thron oʼ God, and serʼ him day and nicht in his Temple: and the Ane that sits on the Thron sal unfauld his tent ower him.

¹⁶ “And they sal hunger nae mair, and gang drouthie nae mair; nor sal the sun smite them, nor ony heat‐blast.

¹⁷ “For the Lamb frae the mids oʼ the Throne sal herd them, and sal airt them to the watirs oʼ the waal‐ee oʼ Life; and God sal dicht awaʼ ilka tear frae their eʼen!”