Revelation 6 - New Testament in Braid Scots 1904 (William Wye Smith)

CHAPTIR SAX. Sax seals lowsed: and aʼ that soud come on the yirth.

¹ And I saw whan the Lamb lowsed ane oʼ the seals, and I heard ane oʼ the leevin‐anes sayin in a voice oʼ thunner, “Come!”

² And I saw, and lo! a white horse, and he that was on it was haudin a bow; and a croon was gien to him; and he gaed oot conquerin and that he soud conquer.

³ And whan he had lowsed the second seal, I heard the second leevin‐ane, sayin, “Come!”

⁴ And forth gaed anither horse, reid; and to him that sat onʼt it was gien to tak peace frae the yirth, and that they soud shed ithersʼ blude; and thar was gien to him a great sword.

⁵ And whan he had lowsed the third seal, I heard the third leevin‐ane sayin, “Come!” And I lookit, and lo! a black horse, and he that sat on it had a pair oʼ bauks in his haun.

⁶ And I heard a voice iʼ the mids oʼ the fowr leevin‐anes, sayin, “Twa gowpens oʼ wheat for a hauf‐merk, and a forpet oʼ barley for a hauf‐merk; and the oyle and the wine ye are‐na to skaith!”

⁷ And whan he lowsed the fowrth seal, I heard the fowrth leevin‐ane sayin, “Come!”

⁸ And I lookit, and lo! a blae horse, and he that sat onʼt had his name “Death,” and the Sheuch followʼt wiʼ him. And he had pooer gien him ower a fowrth pairt oʼ the yirth to slay wiʼ the sword, and wiʼ hungʼer, and wiʼ the death, and wiʼ the wild beass oʼ the yirth.

⁹ And whan he lowsed the fifth seal, I saw, aneath the altar, the sauls oʼ sic as had been slain for the word oʼ God, and for the witness that they held.

¹⁰ And they cryʼt oot wiʼ a lood voice, sayin, “To whatna time, O Lord, the Holie and the True, dost thou no judge and avenge oor blude on thae that dwall on the yirth?”

¹¹ And thar was gien to them, ilk ane, a white robe; and it was tellʼt them that they soud rest their sels a wee while, till their marrows, and their brethren that soud be slain eʼen as they war, soud be aʼ fulfilled.

¹² And I saw whan he lowsed the sixth seal; thar was a great yirdin; and the sun was black as sack‐claith oʼ hair; and the hale mune becam as blude;

¹³ And the starns oʼ heeven fell to the yirth, as a fig‐tree sheds her orra figs, whan shaken oʼ a michty winʼ.

¹⁴ And the heeven slippit awa, as a scroll rowʼt‐up; and every mountain and isle war movʼt oot oʼ their stances.

¹⁵ And the kings oʼ the yirth, and the nobles, and rulers oʼ thoosands, and the rich, and the michty, and ilka thirlman, and ilka freeman, hid theirsels iʼ the caves and iʼ the dens oʼ the mountains,

¹⁶ Sayin to the mountains and the craigs, “Faʼ on us! and beild us frae the face oʼ him wha sits on the Thron, and frae the wrath oʼ the Lamb!

¹⁷ “For the great day oʼ their wrath is come; and wha is fit to staun?”