Revelation 5 - New Testament in Braid Scots 1904 (William Wye Smith)

CHAPTIR FYVE. The Lamb that was slain opens the sealed Buik.

¹ And I saw, on the richt haun oʼ him that sat on the Thron, a buik, written within and withoot, sealʼt up wiʼ seeven seals.

² And I saw a michty Angel, proclaimin wiʼ a soondin voice, “Wha is fit to open the Buik, and to lowse its seals?”

³ And nae man was fit, in heeven, nor yet on the yirth, to open the buik, or eʼen to look upon it.

⁴ And I grat sair, that nae man was fund fit to open the buik, or eʼen to look onʼt.

⁵ And ane frae mang the Elders says tae me, “Greet‐na: see! the Lion oʼ the tribe oʼ Judah, the Rute oʼ Dauvid, has prevailʼt to open the buik, and the seeven seals oʼt.”

⁶ And I saw, iʼ the mids oʼ the Thron, and oʼ the fowr leevin‐anes, and in mids oʼ the Elders, a Lamb staunin, as it had been slain, haein seeven horns and seeven een, whilk are the seeven Spirits oʼ God sent oot till aʼ the yirth.

⁷ And he cam, and has taʼen the buik oot oʼ the richt haun oʼ him that sits on the Thron.

⁸ And as soon as he raxʼt for the buik, the fowr leevin‐anes and the fowr‐and‐twenty Elders fell doon afore the Lamb, haein ilk a harp, and gowden flagons fuʼ oʼ insence, whilk are the prayers oʼ saunts;

⁹ And they sing a new sang, sayin, “Wordie art thou, to tak the buik and to lowse its seals; for thou was slain, and has brocht us to God by thy blude, oot oʼ ilka tribe, and tongue, and folk, and nation;

¹⁰ “And did mak them a kingdom and priests to oor God; and they rule on the yirth!”

¹¹ And I saw, and I heard as a voice oʼ mony Angels, roond aboot the Thron, and oʼ the leevin‐anes, and oʼ the Elders; and their number was myriads of myriads, and thoosands oʼ thoosands.

¹² Sayin wiʼ a soondin voice, “Wordie is the Lamb that was slain, to receive pooer, and riches, and wisdom, and micht, and honor, and glorie, and blessin!”

¹³ And ilka creatit thing that is in Heeven, and on the yirth, and aneath the yirth, and on the sea, heard I sayin, “To him that sits on the Thron, and to the Lamb, be the blessin, and the honor, and the glorie and the pooer, for evir and aye!”

¹⁴ And the fowr leevin‐anes war sayin “Amen!” And the Elders loutit doon and worshipped.