Revelation 4 - New Testament in Braid Scots 1904 (William Wye Smith)

CHAPTIR FOWR. A bonnie blink oʼ the Heevenlie glorie!

¹ Eftir thir things I airtit my een, and lo! a door was unsteekit in heeven; and the first voice I heard, like a buglehorn, was speakin wiʼ me, sayin, “Come ye up here, and I wull set oot afore ye what things maun come to pass here‐eftir.”

² And belyve I was iʼ the Spirit; and lo! a Thron was set in heeven; and on the Thron Ane sittin;

³ And he that was sittin was like to a jasper stane and a cornelian; and a rainbow was aboot the Thron, to look on like an emerant.

⁴ And roond aboot the Thron, fowr‐and‐twenty throns; and on the throns fowr‐and twenty Elders sittin, cledit in robes oʼ white; and on their heads croons oʼ gowd.

⁵ And oot oʼ the Thron gaed oot fire‐flauchts, and voices, and thunners, and thar war seeven fiery lamps alowe afore the Thron, whilk are the seeven Spirits oʼ God.

⁶ And afore the Thron a glessy sea, like to crystal; and iʼ the mids oʼ the Thron, and roond about the Thron, fowr leevin‐anes, fuʼ oʼ een afore and ahint.

⁷ And the first leevin‐ane was like a lion; and the second leevin‐ane like a cauf; and the third leevin‐ane had the face as oʼ a man; and the fowrth leevin‐ane was like to an eagle fleein.

⁸ And the fowr leevin‐anes, ilk ane oʼ them, had sax wings, and war fuʼ oʼ een aroond and within; and rest‐they‐na, day nor nicht, sayin, “Holie, holie, holie! Lord God Almichty, wha Was, and wha Is, and whar Is‐to‐Come!”

⁹ And whan the leevin‐anes gie glorie, and honor, and thanksgivin to him that sits on the Thron, to him wha leeves for evir and evir,

¹⁰ The fowr‐and‐twenty Elders faʼ doon afore him wha sits on the Thron, and gie worship to him wha leeves for evir and evir, and cast doon their croons afore the Thron, sayin,

¹¹ “Wordie art thou, O Lord, eʼen oor God, to receive aʼ glorie, and honor, and pooer; for thou did mak aʼ things; and oʼ thy wull they war, and war creatit!”