Revelation 2 - New Testament in Braid Scots 1904 (William Wye Smith)

CHAPTIR TWA. The message to the Kirks. And tak ye tent that aʼ that could be said gude oʼ them is said, afore ony faut is fund wiʼ what was wrang.

¹ To the messenger oʼ the Kirk in Ephesus write: Thir things quoʼ he wha siccar hauds the seeven starns in his richt haun, he that gangs amid the seeven gowden lamp‐bearers:

² “I ken yere warks, and strivin, and yere patience; and that ye canna thole ill men; and did test them caʼin theirsels ‘Apostles,’ and are‐na, and faund them leears;

³ “And has striven, and for my name did thole, and hasna gien ower.

⁴ “Nane‐the‐less, I hae this again ye, that ye hae turned awa frae yere first love.

⁵ “Bring ye to mind, than, frae whaur ye hae faun; and turn ye, and div ye yere first warks; or Iʼse come tʼye, and wull tak awa yere lamp‐bearer oot oʼ its place — gin ye turn‐na.

⁶ “But this ye hae, that ye scunner at the warks oʼ the Nicolaitanes, eʼen whilk I scunner at.

⁷ “Wha has hearin, lat him hear what the Spirit is sayin to the Kirks! To him wha prevails, I wull gie to him to eat oʼ the tree oʼ Life, whilk is in the Paradise oʼ God.

⁸ “And to the messenger oʼ the Kirk in Smyrna write: Thir things says the First and the Last, wha was deid, and is leevin:

⁹ “I ken yere warks, and dool, and poortith (but rich are ye!), and the miscaʼin oʼ thae that caʼ theirsels Jews, and are‐na, but are a kirk oʼ Sautan.

¹⁰ “Be‐na‐fleyʼt as to whatna things ye are to dree. And look! the Enemy is aboot to cast some oʼ ye intil thrall, that ye may be testit; and yeʼse hae dool ten days. Be ye leal to death, and I wull gie ye the croon oʼ Life!

¹¹ “Wha has hearin, lat him hear what the Spirit says to the Kirks! He that prevails, sal in naegate be skaithed oʼ the second death.

¹² “And to the messenger oʼ the Kirk in Pergamum write: Thir things says he wha has the keen twa‐moothʼd sword,

¹³ “I ken whaur ye dwall, eʼen whaur Sautan has his thron; and that ye haud siccar my name, and that ye didna disown my faith, eʼen iʼ the days oʼ Antipas, my leal ane, wha was slain amang ye, whaur Sautan bides.

¹⁴ “But I hae again ye a wheen things: that ye hae thar sic as haud siccar the teachin oʼ Balaam, wha airtit Balak to set a snare afore the children oʼ Israʼl, to eat oʼ eidol‐sacrifeeces, and commit uncleanness.

¹⁵ “Sae hae ye thae as haud siccar the teachins oʼ the Nicolaitanes, in siclike mainner.

¹⁶ “Turn ye than; but if no, I am comin to ye wiʼ speed, and wull war again them wiʼ the sword oʼ my mooth.

¹⁷ “Wha has hearin, lat him hear, what the Spirit is sayin to the Kirks! To him that prevails, wull I gie oʼ the secret man; and wull gie him a white stane, and on the stane a new name inscrivʼt, that nae ane kens savin he that gets it.

¹⁸ “And to the messenger oʼ the Kirk in Thyatira write: Thir things says the Son oʼ God, he wha has his een like a lowin fire, and his feet like brass made clear:

¹⁹ “I ken yere warks, and lealness, and love, and service, and yere patient tholin, and yere warks; and the end to be mair nor the beginnin.

²⁰ Nane‐the‐less, I hae this again ye, that ye thole that wumman, Jezebel, wha caʼs hersel a prophetess; and she wheedles my servants to commit uncleanness, and to eat eidol sacrifeeces.

²¹ “And I gied her time to turn frae her uncleanness, and she repentit‐na.

²² “Behauld! I wull cast her intil a bed, and thae that commit adultery wiʼ her sal sair pyne, gin they turn‐na frae her warks.

²³ “And Iʼse slay her bairns wiʼ death; and aʼ the Kirks sal come to ken that I am he that rypes the inwarts and the heart; and I wull return ye — ilk ane — conform to yere warks.

²⁴ “But to you I say, to the lave in Thyatira, as mony haud‐na this teachin, and ken‐na ‘the deep things oʼ Sautanʼ (as they say), I lay on ye nae ither burden.

²⁵ “But what ye hae, haud ye siccar, till sic time as I may come!

²⁶ “And he that prevails, and he that hauds on by my warks to the end, I wull gie him pooer ower the nations;

²⁷ “And he sal rule them wiʼ an airn sceptre, as pottersʼ veschels are dung in blads; as I too hae received frae my Faither.

²⁸ “And I wull gie him the starn oʼ the dawin.

²⁹ “He that has hearin lat him hearken what the Spirit is saying to the Kirks!”