Revelation 19 - New Testament in Braid Scots 1904 (William Wye Smith)

CHAPTIR NINETEEN. Rejoicin in Heeven. A vision oʼ a Michty Conqueror.

¹ Eftir thir things I heard as a soondin voice oʼ an unco thrang in Heeven, and they said, “Hallelujah! The salvation, and the glorie, and the pooer oʼ oor God!

² “For true and holie are his judgments; for he has judged the great harlot, wha corruptit the yirth wiʼ her adulteries; and he has avenged the blude oʼ his servants at her haun!”

³ And again they cryʼt, “Hallelujah!” And her reek gangs up for evir and evir.

⁴ And the fowr‐and‐twenty Elders, and the fowr leevin‐anes loutit doun, and worshipped God, that sits on the Thron, sayin, “Eʼen sae! Hallelujah!”

⁵ And a voice cam oot frae the Thron, sayin, “Gie ye praise to oor God, aʼ ye his servants, and thae that reverence him, baith smaʼ and great!”

⁶ And I heard the voice as oʼ an unco thrang, and as the voice oʼ michty thunners, sayin, “Hallelujah! for the Lord oor God, the Almichty, is King!

⁷ “Lat us rejoice, exultin, and gie laud to him; for the bridal oʼ the Lamb has come, and his bride has made hersel ready.

⁸ “And it was gien to her that she soud busk hersel in fine linen, bricht and pure; for the fine linen is the holie deeds oʼ the Saunts.”

⁹ And he said to me, “Write ye, Happy thae wha are bidden to the mairriage‐supper oʼ the Lamb!” And he says to me, “Thir words are the aefauld words oʼ God.”

¹⁰ And I loutit doon afore his feet, to do reverence to him. And he says to me, “No sae! for I am a fellow‐servant wiʼ ye, and oʼ yere brethren wha haud the testimonie oʼ Jesus: gie God worship; for the testimonie oʼ Jesus is the heart oʼ the prophecie.”

¹¹ And I saw the Heevens unsteekit, and lo! a white horse: and he that sat onʼt was caʼd “Leal and True”; and in holiness judges he, and gangs to war.

¹² And his eʼen lowin fire; and on his heid mony croons; and has a name written whilk nae ane kens but his ain sel;

¹³ And he war cleedit in a mantle drookit wiʼ blude, and his name is caʼd, “The Word oʼ God.”

¹⁴ And the airmies oʼ Heeven followʼt wiʼ him, on white horses, clad in fine linen, white and pure.

¹⁵ And oot oʼ his mooth gangs a shairp twa‐moothʼt sword, that sae he may smite the nations; and he wull shepherd them wiʼ a sceptre oʼ airn, while he tramps the press oʼ the wine oʼ the wrath oʼ God the Almichty.

¹⁶ And he has, on his mantle and on his thigh, a name placed: “King oʼ the kingly, and Lord oʼ the lordly!”

¹⁷ And I saw an Angel staunin iʼ the sun; and he cryʼt wiʼ a soondin voice, sayin to aʼ the birds fleein in mid‐air, “Come ye, and gaither thegither to the great supper oʼ God.

¹⁸ “That ye may feast on the flesh oʼ kings, and flesh oʼ captains, and the flesh oʼ michty anes, and flesh oʼ horses, and oʼ thae that sit on them; and flesh oʼ aʼ, baith free and bond, baith smaʼ and great!”

¹⁹ And I saw the beast, and the kings oʼ the yirth, and their hosts, gaitherʼt thegither to war wiʼ him that sat on the horse, and wiʼ his airmy.

²⁰ And the beast was taen, and wiʼ him the fause‐prophet, he that did the ferlies afore him, by whilk he beguiled thae that took the brand oʼ the beast, and thae giean worship to his image; and the twa war cuisten, leevin, intil the loch oʼ fire, lowin wiʼ brunstane.

²¹ And the lave war slain by the sword oʼ him that sat on the horse, the sword that gaed forth oot oʼ his mooth; and aʼ the ravenin birds war filled wiʼ their flesh.