Revelation 18 - New Testament in Braid Scots 1904 (William Wye Smith)

CHAPTIR AUCHTEEN. The faʼ oʼ Babylon: the unco lamentin ower her.

¹ And eftir thir things I saw anither Angel comin doon oot oʼ Heeven, haein great pooer; and the yirth was lichtit up wiʼ his glorie.

² And he cryʼt oot wiʼ a michty voice, sayin, “Faun, faun, is Babylon the great! and come to be the howff oʼ demons, and a dungeon oʼ ilka vile spirit, and a hauld oʼ ilka unclean and abominable bird.

³ “For by the wine oʼ the wrath oʼ her adulteries have faun aʼ the nations; and the kings oʼ the yirth committit adultery wiʼ her: and the mairchants oʼ the yirth, oot oʼ the pooer oʼ her wantonness made theirsels rich.”

⁴ And I heard anither voice frae Heeven, sayin, “Come forth oot oʼ her, my folk! that ye may hae nae marrowin wiʼ her sins, and get‐na oʼ her plagues!

⁵ “For her sins war heapit‐up to the heevens, and God has brocht her ill‐deeds to mind.

⁶ “Gie ye to her eʼen as she hersel has gien, and dooble ye to her the dooble, conform to her wark: in the cup she has made fou, fill ye to her the dooble.

⁷ “As muckle as she magnifyʼt hersel and leeved daintily, by sae muckle gie her torment and wae; for in her heart she was sayin, ‘I sit a queen, and am‐na weedowʼt, and sal see murnin nane!’

⁸ “And sae, in ae day sal come her waes; death and murnin, and famine; and wiʼ fire sal she be brunt‐up: for michty is the Lord God, he wha judges her.

⁹ “And the kings oʼ the yirth, that committit adultery wiʼ her, and leeved wantonly wiʼ her, sal weep and wail ower her, whan they see the reek oʼ her burnin;

¹⁰ “Staunin far‐awa, for the fear oʼ her torment, sayin, ‘Wae, wae! the great citie, the michty citie; for in ae ʼoor has her judgment faun!’

¹¹ “And the mairchants oʼ the yirth greet and mak maen for her, for that their mairchandise nae ane buys ony mair.

¹² “Mairchandise oʼ gowd, and oʼ siller, and oʼ jewels and pearls, and oʼ fine linen, and oʼ purple, and silk, and scarlet, and ilka sort oʼ odorous wud, and ilka thing oʼ ivorie, and ilka thing made oʼ maist precious wud, and oʼ brass, and oʼ airn, and oʼ marble,

¹³ “And cinnamon, and spice, and incense, and perfume, and frankincense, and wine, and oil, and fine flour, and wheat, and nowte, and sheep, and oʼ horses, and chariots, and oʼ bodies and lives oʼ men.

¹⁴ “And the frutes yere saul socht eftir hae depairtit frae ye, and aʼ the dainty and delicate things hae perishʼt frae ye, and in naegate sal they be funʼ.

¹⁵ “The trokers iʼ thae things, they wha becam rich frae her, wull staun far‐awa, for the fear oʼ her torment, greetin and makin maen;

¹⁶ “Sayin, ‘Wae, wae! the michty citie, that had buskit hersel wiʼ fine linen, and purple and scarlet, and had dinkʼt hersel oot wiʼ gowd, and jewel and pearl; in ae ʼoor has been laid waste sic walth as this!’

¹⁷ “And ilka captain, and ilka ane gaun to sea, stude far‐awa,

¹⁸ “And cryʼt oot, behauldin the reek oʼ her burnin, sayin, ‘Whatna citie like to this great citie!’

¹⁹ “And they cuist stoor on their heids, and cryʼt alood, greetin and makin maen, sayin, ‘Wae, wae! the michty citie, in whilk waxʼt rich aʼ thae haein ships on the sea, oot oʼ her luxuries. In ae ʼoor is she laid waste!’

²⁰ “Be blythe ower her, O Heeven! And aʼ ye saunts, and Apostles, and prophets! for God has judged her for yere sakes.”

²¹ And an Angel, a michty ane, liftit up a stane, like a great mill‐stane, and cuist it into the sea, sayin, “Sae, wiʼ unco micht sal be hurled doon the great citie, Babylon; and in naegate ony mair be funʼ.

²² “And voice oʼ harpers, and minstrels, and pipers, and buglers, sal be heard in ye nae mair! And ony craftsman oʼ ony craft, sal be funʼ in ye nae mair! And the soond oʼ a milʼstane sal be heard in ye nae mair!

²³ “And the licht oʼ a crusie sal nae mair shine in ye. And the voice oʼ bridegroom and oʼ bride sal be nae mair heard in ye! For thy mairchants war nobles on the yirth; for that aʼ the nations war beguiled by her sorceries.

²⁴ “And the blude oʼ prophets and saunts was funʼ in her, and oʼ aʼ thae that had been slain upon the yirth.”