Revelation 17 - New Testament in Braid Scots 1904 (William Wye Smith)

CHAPTIR SEVENTEEN. The Scarlet Wumman: her abominations, and her punishment.

¹ And thar cam oot ane oʼ the seeven Angels, thae haein the seeven flagons, and spak wiʼ me, and quoʼ he, “Come! and I wull schaw ye the judgment oʼ the great harlot, that sits on mony waters,

² “Wiʼ wham the kings oʼ the yirth hae committit uncleanness, and thae dwallin on the yirth hae been made drucken, oot oʼ the wine oʼ her lecherie.”

³ And he carryʼt me awa iʼ the Spirit intil the wilderness; and I saw a wumman sittin on a scarlet beast, whilk was fuʼ oʼ names oʼ blasphemie, wiʼ seeven heids and ten horns.

⁴ And the wumman was buskit in purple and scarlet, and was dinkit oot wiʼ gowd and jewels and pearls, haudin a gowden cup in her haun fuʼ oʼ abomination, eʼen the abomination oʼ her adulteries.

⁵ And on her heid a name written, a mysterie: “Babylon the Great, Mither oʼ Harlots, and oʼ the abominations oʼ the Yirth!”

⁶ And I saw the wumman drucken wiʼ the blude oʼ the saunts, and wiʼ the blude oʼ the martyrs oʼ Jesus, and I ferlied whan I saw her, wiʼ an unco ferliein.

⁷ And the Angel said to me, “Hoo did ye ferlie? I wull tell ye the secret oʼ the wumman, and oʼ the beast that bears her, that has the seeven heids and the ten horns.

⁸ “The beast that ye saw was, and is‐na, is to rise frae the abyss, and gangs awa to destruction. And thae that dwall on the yirth sal ferlie, whase names hae no been putten‐doon iʼ the Buik‐oʼ‐Life frae the fundation oʼ the warld, at behauldin the beast, hoo that he was, and is‐na, and sal come.

⁹ “Here is the mind that has wisdom. The seeven heids are seeven mountains, whaur the wumman sits.

¹⁰ “And they are seeven kings; the fyve fell; the ane is; and the ither isna yet come; and whan he comes, he maun bide for a wee while.

¹¹ “And the beast whilk was, and is‐na, eʼen he is the auchth, and is oʼ the seeven; and gangs awa intil destruction.

¹² “And the ten horns ye saw are ten kings; wha hae gotten nae kingdom as yet, but hae pooer gien them ae ʼoor wiʼ the beast.

¹³ “Thir are oʼ ae mind, and they gie their pooer and authoritie to the beast.

¹⁴ “Thir mak war wiʼ the Lamb, and the Lamb wull prevail again them; for he is Lord oʼ the lordly, and King oʼ the kingly; and thae that are wiʼ him are bidden, and chosen and leal!”

¹⁵ And quoʼ he to me, “The watirs ye did see, whaur the harlot is sittin, are folk, and thrangs, and nations, and tongues.

¹⁶ “And the ten horns ye saw, and the beast, thir wull hate the harlot, and wull mak her bare and nakit, and wull eat her flesh, and burn her up wiʼ fire.

¹⁷ “For God pat iʼ their hearts to fulfil his mind, and to be aʼ oʼ ae mind, and gie their kingdom to the beast, till aʼ Godʼs words come to pass.

¹⁸ “And the wumman ye saw is the great citie; she that has a kingdom ower the kings oʼ the yirth.”