Revelation 14 - New Testament in Braid Scots 1904 (William Wye Smith)

CHAPTIR FOWRTEEN. The Lamb, wiʼ aʼ his Sealed‐Anes. Babylon faʼs. The Hairst oʼ the Warld.

¹ And I saw, and behauld! the Lamb, staunin on Mount Zion; and wiʼ him a hunner and forty‐fowr thoosand, wiʼ his name and his Faitherʼs name inscrivʼt on their broo.

² And I heard a voice oot oʼ Heeven, as the soondin oʼ mony watirs, as an unco voice oʼ thunner; and the voice that I heard was as oʼ harpers, soondin on their harps.

³ And they sing a new Sang, in presence oʼ the Thron, and in presence oʼ the fowr leevin‐anes, and oʼ the Elders; and nae man could ken the Sang but the hunner and forty‐fowr thoosand that war ransomed frae the yirth.

⁴ Thir are they that are‐na defiled in incontinency; for they are pure. Thir are they wha follow the Lamb whaursaeʼer he may lead; thir war ransomed frae ʼmang men, a first‐frute for God and the Lamb.

⁵ And iʼ their mouʼ was nae guile; for they are wyteless.

⁶ And I saw anither Angel, flyin iʼ the mids oʼ the lift, haein the evir‐durin Gude‐news to deliver to thae that dwall on the yirth, eʼen to ilka nation, and tribe, and tongue, and folk.

⁷ Cryin wiʼ a soonding voice, “Revere God, and gie him laud; for the ʼoor oʼ his judgment has come; and gie ye worship to him who made the Heevens and the Yirth, and the sea, and the waal‐ees oʼ watirs.”

⁸ And anither, a second Angel, followʼt sayin, “Babylon, the michty, is faun, is faun! wha garʼt aʼ nations to drink oʼ the wine oʼ the wrath oʼ her lecherie!”

⁹ And anither Angel, a third, followʼt wiʼ them, cryin wiʼ a soondin voice, “Gin ony ane worships the beast and his image, and taks the brand on his broo, or on his haun,

¹⁰ “He eke sal drink oʼ the wine oʼ the wrath oʼ God, whilk is teemed oot unmixed iʼ the cup oʼ his wrath; and sal be tormentit in lowe and brunstane iʼ the presence oʼ holie Angels, and iʼ the presence oʼ the Lamb.”

¹¹ And the reek oʼ their torment gangs up for evir and evir; and they hae nae ease day nor nicht, they that worship the beast and his image, and gin ony ane taks the brand oʼ his name.

¹² Here is the tholin iʼ the saunts, they wha keep Godʼs commauns, and their lealness to Jesus!

¹³ And I heard a voice oot oʼ heeven sayin, “Write ye! Happy the deid wha dee iʼ the Lord, frae this oot! Aye, testifies the Spirit, that they may rest frae aʼ their weary moil, and their warks gang wiʼ them!”

¹⁴ And I saw, and look! a white clud; and on the clud Ane sittin, like tae the Son oʼ Man, wiʼ a croon oʼ gowd upon his heid, and in his haun a shairp sickle.

¹⁵ And anither Angel cam forth oot oʼ the Temple, cryin oot wiʼ a soonding voice to him that was sittin on the clud, “Pit in thy heuk and shear; for the ʼoor to shear has come; for the hairst oʼ the yirth is ripe.”

¹⁶ And he that sat on the clud swung in his heuk on the yirth, and the yirth was hairstit.

¹⁷ And anither Angel came oot oʼ the Temple that was in heeven, he too haein a shairp heuk.

¹⁸ And anither Angel came forth frae the altar, haein pooer ower fire; and he cryʼt wiʼ a soondin voice to him that had the shairp heuk, sayin, “Pit in yere heuk, and gaither ye the clusters oʼ the vine‐stock oʼ the yirth! for her grapes are fu ripe!”

¹⁹ And the Angel swung his heuk intil the yirth, and gatherʼt in the vintage oʼ the yirth; and cuist it intil the great wine‐press oʼ the wrath oʼ God.

²⁰ And the wine‐press was trampit ayont the citie yetts; and forth cam blude oot oʼ the wine‐press, eʼen to the horse‐bridles, the length oʼ twa‐hunner mile.