Revelation 11 - New Testament in Braid Scots 1904 (William Wye Smith)

CHAPTIR ELEEVEN. The measurin‐wand; the Twa Witnesses.

¹ And thar was gien me a reed like to a wand; and it was said, “Rise ye, and measur the temple oʼ God, and the altar, and aʼ that worship thar!

² “And the coort that is ootside the Temple leaʼ ye ootside, and measur‐it‐na; for it is gien ower to the nations: and the holie citie wull they tramp doon forty‐twa months.

³ “And I wull gie to my Twa Witnesses, and they sal prophesie twal‐hunner and saxty days, cleedit in sack‐claith.

⁴ “Thir are the twa olive‐trees, and the twa lamp‐bearers, whilk staun iʼ the presence oʼ the God oʼ the haill yirth.

⁵ “And gif ony man wad do them skaith, a lowe comes oot oʼ their mouʼ and devoors their faes; and gif ony ane wad do them skaith, sae maun he be slain.

⁶ “Thir hae the pooer to steek heeven, that thar be nae rain or weet iʼ the days oʼ their prophesyin; and hae pooer ower the watirs, to turn them intil blude; and to smite the yirth wiʼ aʼ plagues, as aft as they wull.

⁷ “And, at siccan a time as they sal perfete their witnessin, the beasʼ that comes up oot oʼ the abyss wull mak war wiʼ them, and owercome them, and slay them.

⁸ “And their corses wull lie on the braid causey oʼ the great citie, whilk spiritually is caʼd Sodom, and Egypt, whaur eʼen their Lord was crucifyʼt.

⁹ “And a wheen frae ʼmang the folk, and tribes, and tongues, and nations look on their corses, thrie days and a hauf, and they dinna alloo their corses to be putten in a tomb.

¹⁰ “And they that dwall on the yirth rejoice ower them, and are blythe; and they send presents ane to anither; for thir twa prophets wadna lat‐be them dwallin on the yirth.

¹¹ “And eftir the thrie days and a hauf, a spirit oʼ life frae God enters them; and they stude on their feet: and muckle fear fell on thae behauldin them.

¹² “And they heard a soondin voice oot oʼ Heeven, sayin to them, ‘Come ye up here!’ And they gaed up intil Heeven, in a clud; and their faes saw them.

¹³ “And in that same ʼoor, thar cam an unco yirdin, and the tenth‐pairt oʼ the citie was whammlʼt owre; and thar war slain by the yirdin, names oʼ men seeven thoosand: and the lave war fleyʼt, and gied glorie to the God oʼ Heeven.

¹⁴ “The second wae is past; and behauld! the third wae is comin on.”

¹⁵ And the seeventh Angel soondit; and thar war lood voices in Heeven, sayin, “The Kingdom oʼ the Warld is come to be the Kingdom oʼ oor Lord, and oʼ his Anointit; and he sal reign for evir and aye!”

¹⁶ And the fowr‐and‐twenty Elders, wha sit on their throns, fell on their faces, and adored God, sayin,

¹⁷ “We gie thee thanks, O Lord God Almichty, wha Is, and wha Was, for that thou hast taen thy great pooer, and did become King.

¹⁸ “And the nations war offendit; and thine angʼer cam, and the time oʼ the deid to be judged; and to gie reward to thy servants the prophets, and to the saunts, and to thae wha reverence thy name, smaʼ and great; and to destroy them that destroy the yirth!”

¹⁹ And the Temple oʼ God that is in Heeven was unsteekit, and the Ark oʼ his Covenant in his Temple was seen; and thar cam fire‐flauchts, and voices, and thunner, and a yirdin, and unco hail.