Philippians 3 - New Testament in Braid Scots 1904 (William Wye Smith)

CHAPTIR THRIE. Beware oʼ fause teachers! Aʼ things oʼ oor ain are naething for Christ.

¹ And noo, to sum up, my brethren: Be blythe iʼ the Lord! To write to you the same things isna fashious, whilst for you it is safe.

² Be ye ware oʼ the dougs, tak ye tent oʼ the workers oʼ ill, keep awa frae the conceesion.

³ For we are the circumceesion, wha worship in Godʼs Spirit, and glorie in Christ Jesus, and pit nae stress on things oʼ the flesh.

⁴ Eʼen though I mysel micht lay some stress eʼen on things oʼ the flesh. Gin ony ither man thinks to hae ocht to glorie oʼ in the flesh, I yet mair!

⁵ In circumceesion, an aucht‐day bairn; oʼ Israʼlʼs sons; oʼ Benjaminʼs tribe; a Hebrew oʼ Hebrews; as to law, a Pharisee;

⁶ As to zeal, persecutin the Kirk; as to richtousness oʼ Law, wyteless.

⁷ But, whatna things war a gain to me, thae hae I esteemed loss for the sake oʼ Christ!

⁸ But, in truth, doubtless I am esteemin aʼ things to be loss, for the unco preciousness oʼ the lear oʼ Jesus Christ my Lord; for wham I sufferʼt the loss oʼ aʼ things, and coont them as midden‐orts, that I may win Christ,

⁹ And may be in him; no haein for my richtousness that frae the Law — but that throwe faith in Christ; the richtousness that is frae God, by faith:

¹⁰ To come to ken him, and the pooer oʼ his Risin‐again, and to be a marrow wiʼ him in his sufferans, bein conform to his death.

¹¹ Gin aiblins, by ony means, I may win on to the “Risin‐again”; that frae amang the deid.

¹² No that I hae it noo, or sae sune had been made perfete; but I press on, gin that I may grip haud oʼ that for whilk I was grippit by Christ.

¹³ Brethren, I, as to mysel allenarlie, am‐na yet reckonin to hae grippit haud; but ae thing I div: forgettin the things ahint, and raxin oot to thae things that are afore,

¹⁴ I press on for the gree, for the prize oʼ the biddin (frae on heigh) oʼ God in Christ Jesus.

¹⁵ As mony oʼ us, than, as are oʼ fuʼ stature, lat this be oor mind; and gin ye be mindit anither way, God wull mak it plain to ye.

¹⁶ Nane‐the‐less, as far on as we hae gotten, lat us resolve to gang on in the same rule.

¹⁷ Brethren! be ye followers oʼ me thegither; and tak tent oʼ thae that sae gang, eʼen as ye hae us for an example.

¹⁸ For mony walk, oʼ wham I aft tellʼt ye, and noo, eʼen wiʼ tears tell ye: faes oʼ the Cross oʼ Christ!

¹⁹ Whase hinner end is destruction, whase god is their wame, and whase glorie is in their shame; wha mind things oʼ the yirth.

²⁰ For oor citizen‐richts are in Heeven, oot oʼ whilk fain look we for a Saviour, the Lord Jesus Christ;

²¹ Wha wull change the body oʼ oor laigh‐estate, to be like to the body oʼ his glorie; conform to the inwart workin, whaur‐by he has pooer eʼen to bring aʼ things intil subjection to his sel.