Philippians 2 - New Testament in Braid Scots 1904 (William Wye Smith)

CHAPTIR TWA. Christʼs humbleness. Timothy and anither sent to them.

¹ Gin, than, thar is ony comfort in Christ, gin ony consolation oʼ love, gin ony fellowship oʼ the Spirit, gin ony tender‐mercies and compassions,

² Croon ye my joy, that ye aʼ may regaird the same things, and hae the same love; aʼ ane in saul, the ae thing regairdin.

³ Doin naething for strifeʼs sake, nor for prideʼs sake; but in humbleness oʼ mind, lookin aye on ane‐anither as bein better nor yersels.

⁴ No lookin on yere ain things allenarlie, but ilk ane at anitherʼs things.

⁵ That whilk ye in Christ Jesus prefer, that prefer ye in yersels;

⁶ Wha bein originally iʼ the form oʼ God, thocht it no a thing to seize on, to be coontit aiqual wiʼ God;

⁷ But humblʼt his sel, takin a servantʼs form, and comin in manʼs likeness; and, bein fund in condition as a man,

⁸ He made his sel lowly, becomin obedient eʼen till the deid; aye, death on a cross.

⁹ Whaur‐for God upliftit him far on heigh, and gied him a name whilk is aboon ilka name;

¹⁰ That iʼ the name oʼ Jesus, ilka knee soud lout, oʼ thae in heeven, and thae on the yirth, and aneath the yirth,

¹¹ And ilka tongue soud own that Jesus Christ is Lord, to the glorie oʼ God the Faither.

¹² Sae, than, beloved, eʼen as ye hae aye obeyʼt, no in my presence alane, but noo muckle mair whan I am awa, work ye oot yere ain salvation wiʼ fear an trimʼlin.

¹³ For God it is wha is workin in ye, baith the ettlin and the inward doin conform to his gude pleasur.

¹⁴ And do aʼ things free frae yammerin, and argle‐barglin,

¹⁵ That ye may become fautless and innocent bairns oʼ God, wyteless amang a thrawart and perverse generation; amang wham schaw yersels as lichts iʼ the warld;

¹⁶ Giean oot the word oʼ life, for a glorie to me iʼ the day oʼ Christ, that I didna rin in vain, nor toil in vain.

¹⁷ But, gin I am eʼen to be offerʼt on the sacrifeece and service oʼ yere faith, I am blythe in mysel and blythe wiʼ you.

¹⁸ And — as to the same thing — be ye blythe in yersels and blythe wiʼ me!

¹⁹ But I am lookin forrit iʼ the Lord, sune to send Timothy to ye; sae that eʼen I may be made blythe, whan I ken yere state.

²⁰ For I hae nae ane like him in saul, wha wull be sae aefauld‐anxious aboot yere state:

²¹ For they aʼ seek eftir their ain things, no the things oʼ Jesus Christ.

²² But the prufe oʼ him ye ken; for, like a bairn wiʼ a faither, he has had service thegither wiʼ me iʼ the Gude‐word.

²³ Sae I am lookin forrit to send him at ance, whaneʼer I may look awa frae the things that concern me.

²⁴ But I lippen iʼ the Lord that I mysel may come sune.

²⁵ Yet I thocht it needfuʼ to send tʼye Epaphroditus, my brither, and marrow, and fellow‐sodger, but your messenger, and the provider for my needs.

²⁶ For he was unco fain to see ye aʼ; and in dolor for that ye had heard he had been ill.

²⁷ And, in truth, he was ill, and nar to the deid; but God schawed mercie to him, and no to him allenarlie, but to me as weel, least sorrow on sorrow I soud dree.

²⁸ Wiʼ the mair entreaty I hae sent him, that, seein him again, ye soud be blythe, and I hae the less dool.

²⁹ Be ready than to tak him tʼye, wiʼ aʼ joy iʼ the Lord; and siclike as thir haud ye in honor;

³⁰ For it was for the sake oʼ Christʼs wark he was nar to the deid; rinnin risk wiʼ his life that he micht mak up yere want oʼ care for me.