Philippians 1 - New Testament in Braid Scots 1904 (William Wye Smith)

CHAPTIR ANE. Some preached, for that they war leal to Christ; and some oot oʼ thrawartness.

¹ Paul and Timothy, servitors oʼ Christ Jesus, to aʼ the saunts in Christ Jesus that are in Philippi, wiʼ the bishops and deacons:

² Tender love to you, and peace, frae God oor Faither, and the Lord Jesus Christ.

³ I am aye giean thanks to my God, at ilka thocht oʼ you,

⁴ Aye in ilka prayer oʼ mine for ye aʼ, makin request for ye wiʼ joy,

⁵ On accoont oʼ yer fellowship iʼ the Gude‐word, frae the first day till noo:

⁶ Bein siccar iʼ this vera thing, that he wha begude a gude wark in ye, wull perfete it to the day oʼ Christ Jesus.

⁷ Eʼen as it is richt in me to hae siccan a regaird oʼ ye; for that ye hae me iʼ yere heart, baith iʼ my bonds, and iʼ the defendin and makin steive the Gude‐word; ye aʼ bein marrows wiʼ me oʼ my grace.

⁸ For God is witness to me, hoo fain I am for ye aʼ, in the tender mercies oʼ Jesus Christ.

⁹ And for this I pray, brethren, that yer love yet mair and mair may exceed, in fuʼ knowledge and discernment;

¹⁰ To the end ye may pit to the test the things that are gude, that ye may be holie and fautless to the day oʼ Christ;

¹¹ Bein fuʼ oʼ the frute oʼ richtousness; that whilk is throwe Jesus Christ, to the glorie and praise oʼ God.

¹² Noo, I wad hae ye to ken, brethren, that the things regairdin me hae raither come oot to the advantage oʼ the Gude‐word.

¹³ Sae as my bonds hae been made kent iʼ the hail Heid‐quarters, and to aʼ the lave.

¹⁴ And sae as that the feck oʼ the brethren, haein been heartened iʼ the Lord by my bonds, are mair uncolie bauld, fearless speakin the word oʼ God.

¹⁵ A wheen, indeed, oot oʼ envy and strife, and some oot oʼ gude‐wull, are preachin Christ.

¹⁶ Thir, oot oʼ love, kennin I am set for the defence oʼ the Gude‐word;

¹⁷ But thae, oot oʼ thrawartness are settin oot Christ; no in lealness; thinkin to mak fash to me iʼ my bonds.

¹⁸ Weel what? Juist this, that in ony way, gin it be in deceit or in truth, Christ is proclaimed; and I in this am blythe, and wull be blythe!

¹⁹ For I ken that this sal turn aʼ to my salvation, throwe yere prayers, and the giean to me oʼ the Spirit oʼ Jesus Christ;

²⁰ Conform to my fain lookin‐forrit, and my hope, that in naething sal I be putten to shame; but that wiʼ aʼ freeness oʼ speech, as aye, sae eʼen noo, Christ sal be glorifyʼt iʼ my body, gin it be by life, or by death.

²¹ For to me, leevin is Christ; and deein is treasur.

²² But, gin leevin iʼ the flesh is Christ, this to me is a reward oʼ toil; and whatna I sal wale I say‐na,

²³ But I am hauden atwixt the twa; haein an unco fainness to be looten awa, and to be wiʼ Christ, for this is far, far better!

²⁴ But to be bidinʼ iʼ the flesh is mair necessar for yere sakes.

²⁵ And haein oʼ this been made siccar, I lippen that I sal bide, and stay ahint wiʼ ye aʼ, for the up‐biggin oʼ yere faith, and for yere joy.

²⁶ That yere glorying may be the mair in Christ Jesus — as to me — by my presence wiʼ ye again.

²⁷ Only, in siccan a way as is wordie oʼ the Gude‐word, airt yere lives; sae that gin I come and see ye, or gin I be frae ye, I may be hearin oʼ ye, that ye staun siccar iʼ ae spirit, wiʼ ae saul joined thegither, for the faith oʼ the Gude‐word;

²⁸ And no bein fleyʼt in ony thing by thae opposin their sels: whilk, in truth, is for them a token oʼ destruction, but oʼ yere salvation; and this frae God.

²⁹ For, to you was gien as a favor, no only to be haein faith in Christ, but eke in his behauf to be sufferan:

³⁰ Haein the like tulzie that ye saw in me, and noo hear in me.