Philemon 1 - New Testament in Braid Scots 1904 (William Wye Smith)

CHAPTIR ANE. Paul speaks weel oʼ Philemonʼs faith; and commends his servin‐man Onesimus.

¹ Paul, a prisoner oʼ Christ Jesus, and Timothy, oor brither, to Philemon, oor weel‐loʼed, and oor marrow,

² And to Apphia oor sister, and to Archippus oor sodger‐marrow, and to the Kirk in yere hoose —

³ Tender‐love to ye, and peace, frae God oor Faither and the Lord Jesus Christ.

⁴ I am gien thanks to my God, aye pittin ye iʼ my prayers:

⁵ Hearin oʼ yere love and faith that ye hae to the Lord Jesus, and to aʼ the saunts,

⁶ That the fellowship oʼ yere faith may be zealous in the schawin‐forth oʼ ilka gude thing in ye, until Christ.

⁷ For mickle joy had I, and comfort, in yere love; for that the tender‐affections oʼ the saunts are refreshed by you, brither;

⁸ And sae, — thoʼ unco bauldness oʼ speech I hae in Christ to press upon ye what is becomin —

⁹ Yet I wad raither entreat: bein siccan a ane as Paul, in eild, but noo a prisoner oʼ Christ Jesus.

¹⁰ I entreat you regairdin a bairn oʼ mine, wham I hae begotten iʼ my bonds, Onesimus;

¹¹ Him, at ae time oʼ nae profit to ye; but noo unco serviceable to you and me;

¹² Wham I send back tʼye; him, that is my ain tender‐affections!

¹³ Wham I wad fain ettle wiʼ mysel to detain, that, in your behauf he micht do service to me, iʼ the bonds oʼ the Gude‐word.

¹⁴ But, wantin word oʼ yere mind, naething was I willin to do; that no oʼ necessity, but oʼ free choice, yere gude soud be.

¹⁵ For aiblins for siccan a cause he was pairtit wiʼ ye for a wee, that ye micht hae him back for aye:

¹⁶ Nae mair as a servant, but aboon a servant, brither weel‐loʼed — vera specially to me, but hoo mickle mair to you — baith iʼ the flesh and the Lord!

¹⁷ Gin than ye coont me as ane wiʼ yersel, tak him to ye, as mysel.

¹⁸ And gin aiblins he has wranged ye, or is indebted, the same tae me div ye reckon.

¹⁹ I Paul pit it doon wiʼ my ain haun; I wull meet it; thoʼ I say‐na tʼye hoo ye are awn me eʼen yere ain sel.

²⁰ Aye, brither! lat me hae joy oʼ ye iʼ the Lord: refresh ye my tender‐affections in Christ!

²¹ Lippenin to yere courtesie, I wrate to ye, kennin that ye wull do eʼen mair nor I seek.

²² But, at the same time, mak me ready a lodgin; for I look forrit, throwe yere prayers, that I sal be gien as a favor to ye.

²³ Thar salute ye Epaphras, my prison‐marrow in Christ Jesus,

²⁴ And Mark, Aristarchus, Demas and Luke, my brither‐workers.

²⁵ The tender‐love oʼ oor Lord Jesus Christ be wiʼ yere spirit!