Matthew 4 - New Testament in Braid Scots 1904 (William Wye Smith)

CHAPTIR FOWR. Sautan has a tulzie wiʼ Christ. Jesus taks up wiʼ Capernaum; and bids a wheen disciples.

¹ Than was Jesus airtit by the Spirit intil the wilderness, thar to be testit oʼ the Enemy.

² And whan he had fastit for forty days and nichts, he was spent wiʼ hunger.

³ And whan the Tempter cam till him, quoʼ he, “Gin thou be Godʼs Son, speak to thir stanes, that they be bannocks!”

⁴ But he, answerin till him, said, “No allenarlie on breid leeves man, but by ilk word oʼ Godʼs mooth!”

⁵ Than the deevil taks him wiʼ him intil the holie citie, and pits him on the tapmaist towerickie oʼ the Temple.

⁶ And quoʼ he till him, “Gin ye be Godʼs Son, cast yersel ower; for it is putten‐doon, ‘Till his Angels sal he gie chairge anent ye; and on their hauns sal they haud ye up, that ye clour‐na yere fit again a stane!’ ”

⁷ Quoʼ Jesus till him, “Ance mair it is putten‐doon, ‘Ye sanna temp the Lord yere God!’ ”

⁸ And again the Enemy taks him up intil an unco heigh mountain, and airts him till aʼ the kingdoms oʼ the yirth, and aʼ their glorie;

⁹ And says till him, “Aʼ thae things gie I tʼye gin ye, faʼin doon, gie worship to me!”

¹⁰ Than quoʼ Jesus till him, “Awa, Sautan! for it is putten‐doon, ‘The Lord yere God sal ye worship; and him alane sal ye serʼ!’ ”

¹¹ Than the deevil quats him; and lo! the Angels cam to serʼ him.

¹² Noo whan it was tellʼt him that John was taen haud oʼ, he gaed awaʼ intil Galilee:

¹³ And forsakin Nazareth, he cam and made his dwallin iʼ Capernaum, on the side oʼ the Loch, on the border oʼ Zabulon and Naphtali;

¹⁴ That it micht come to pass what said Esaiah the Prophet,

¹⁵ “Land oʼ Zabulon! and land oʼ Naphtali! Galilee oʼ the nations!

¹⁶ “The folk that were sittin iʼ the mirk, saw an unco licht; and till aʼ thae sittin iʼ the land and the mirkness oʼ the deid, the licht raise up!”

¹⁷ Frae that time forth begude Jesus to preach; and quoʼ he, “Repent ye! for Heevenʼs kingdom draws nar‐haun!”

¹⁸ And walkin by the Loch oʼ Galilee, he saw twa brithers, Simon, (caʼd Peter), and Andro his brither, castin aboot a net iʼ the Loch, for they war fisher‐folk.

¹⁹ And quoʼ he to them, “Follow ye me! and Iʼse mak ye fishers oʼ men!”

²⁰ And they, withoot ado, left the nets, and gaed eftir him.

²¹ And gangin forrit tharawa, he saw ither twa brithers, James, son oʼ Zebedee, and his brither John, in a smack wiʼ Zebedee their faither, workin on their nets: and he bad them “Come!”

²² And they, forsakin the boat, and their faither, gaed eftir him.

²³ And Jesus gaed ower aʼ Galilee, instructin iʼ their kirks, and giean forth the Blythe‐Message oʼ the Kingdom, and healin aʼ diseases, and aʼ infirmities amang the folk.

²⁴ And the sough oʼ him gaed oot intil aʼ Syria: and they feshʼt till him aʼ wha war ill wiʼ aʼ diseases and pains, and thae possessʼt wiʼ demons, and dementit, and that had a stroke: and he healed them.

²⁵ And unco thrangs followʼt him — frae Galilee, and the Ten Cities, and Jerusalem, and Judea, and ayont the Jordan.