Matthew 16 - New Testament in Braid Scots 1904 (William Wye Smith)

CHAPTIR SAXTEEN. The barm oʼ the Pharisees. Peterʼs graun confession. What is tint, and what is won.

¹ And the Pharisees and the Sadducees cam, and in a twafauld way speirʼt at him, “Gin he wadna schaw them a token frae Heeven?”

² He answerʼt, and quoʼ he, “Whan it is eʼenin ye say, ‘Fair wather; for the sky is reid!’

³ “And iʼ the mornin, ‘Broken wather the day, for the sky is reid and lowerin!’ Ye ken hoo to judge the scaum oʼ the sky; — can ye no the signs oʼ the times?

⁴ “An ill‐deedie and adulterous race seek eftir some sign; and nae sign sal be giʼen tillʼt but the sign oʼ Jonah.” And he gaed aff frae them.

⁵ And the disciples cam to the ither side, and forgat to tak breid.

⁶ And Jesus said to them, “Tak tent, and troke ye‐na wiʼ the barm oʼ the Pharisees and Sadducees!”

⁷ And they spak ane till anither, sayin, “We took nae breid!”

⁸ And Jesus, kennin it, said, “O ye oʼ the smaʼ faith, why soud ye reason amang yersels for that ye hae nae breid?

⁹ “Dae ye no ken, dae ye no mind, the fyve bannocks oʼ the fyve thoosanʼ: and hoo mony baskets ye gaitherʼt?

¹⁰ “Naither the seeven bannocks oʼ the fowr thoosanʼ, and hoo mony creels ye gaitherʼt?

¹¹ “Hoo isʼt ye dinna ken I spak to‐ye‐na anent breid; but to tak tent and beware oʼ the teachins oʼ the Pharisees and the Sadducees!”

¹² Than saw they hoo he bad them no beware oʼ the barm oʼ the breid, but oʼ the doctrines oʼ the Pharisees and Sadducees.

¹³ Whan Jesus had come intil the kintra‐side oʼ Philipʼs Cesarea, he speirʼt at his disciples, “Wha dae folk say the Son oʼ Man is?”

¹⁴ And quoʼ they, “Some, John the Baptist; and some, Elijah; and ithers, Jeremiah, or ane oʼ the Prophets.”

¹⁵ He says to them, “But wha say ye that I am?”

¹⁶ And Simon Peter spak, and quoʼ he, “Thou art the Anointit Ane, the Son oʼ the Leevin God!”

¹⁷ And Jesus answerin, says till him, “Happy are ye, Simon, son oʼ John! for nae flesh and blude tellʼt it tʼye, but my Faither iʼ the Heevens.

¹⁸ “And I say tʼye, ye are a Rockman; and on this Rock wull I bigg my kirk; and the yetts oʼ Hell sal nevir owercome it!

¹⁹ “And I wull gie tʼye the keys oʼ Heevenʼs Kingdom; and what ye sal bind on the yirth sal be bund in Heeven; and what ye sal lowse on the yirth sal be lowsed in Heeven.”

²⁰ Than chairged he the disciples no to tell ony man he was the Anointit Ane.

²¹ Frae that time forrit Jesus begude to schaw till his disciples, hoo that he bude gang to Jerusalem, and dree mony things oʼ the Elders and Heid‐priests and Writers; and be slain; and on the third day be waukened again.

²² Than Peter took him aside, repruvin him; and quoʼ he, “Hae mercy on thyselʼ! this sal nevir be thy faʼ!”

²³ But he turned him aboot, and quoʼ he to Peter, “Ahint me, Sautan! ye are but a snare to me! for ye seek‐na the things oʼ God, but the things oʼ men!”

²⁴ Than quoʼ Jesus to his disciples, “Gin ony man wad come eftir me, lat him deny his sel, and tak up his cross, and follow me.

²⁵ “For whasae wad save his life sal tine it; and whasae wull tine his life for my sake, sal win it.

²⁶ “For what is a man the better, thoʼ he win the hail warld, and tine his ain saul? or what sal a man gie as caʼtion for his saul?

²⁷ “For the Son oʼ Man comes in the glorie oʼ his Faither, wiʼ the Angels; and than sal he gie every man accordin as his wark sal be.

²⁸ “Truly say I tʼye, thar are thae staunin here, wha sal in naegate pree death, till they hae seen the Son oʼ Man comin in his Kingdom!”