Matthew 15 - New Testament in Braid Scots 1904 (William Wye Smith)

CHAPTIR FYFTEEN. What fyles a man? The Canaan‐wumman. A great denner on smaʼ providin.

¹ Than cam Writers and Pharisees oʼ Jerusalem to Jesus; and quoʼ they,

² “Hoo isʼt yere disciples mind‐na the biddins oʼ the faithers oʼ auld? For they eat breid wiʼ unweshin hauns.”

³ But he answerʼt them, and quoʼ he, “Hoo isʼt that ye too gang contrar to Godʼs commaun wiʼ yere biddens?

⁴ “For God commandit, ‘Honor faither and mither,’ and, ‘Wha bans faither or mither, lat him dee!’

⁵ “But ye say, ‘Wha says till his faither or his mither, It is aʼ devotit, ocht that ye micht hae by me;

⁶ “ ‘He sal do nocht to mainteen his faither or his mither.’ Sae hae ye brocht Godʼs commaun to nocht by yere biddens.

⁷ “Ye fause anes! Esaiah weel foretellʼt oʼ you, sayin,

⁸ “ ‘This folk come nar me wiʼ their mouʼ, and gie me honor wiʼ their lips, but their heart is far awa!

⁹ “ ‘But aʼ in vain worship they me, layin down for rules the biddens oʼ men.’ ”

¹⁰ And he caʼd till him the folk, and quoʼ he to them, “Hear ye, and understaun!

¹¹ “It isna what gangs intil the mooth that fyles the man; but what comes oot oʼ the mooth that fyles the man!”

¹² Than cam his disciples, and quoʼ they, “Kennʼst thou the Pharisees war ill‐pleased, whan they heard yon sayin?”

¹³ But he said, “Ilka plant no oʼ my Heevenlie Faitherʼs plantin, sal be uprutit.

¹⁴ “Lat abee! theyʼre but blinʼ leaders oʼ the blinʼ! And gin the sichtless airt the sichtless, baith sal faʼ intil the sheugh.”

¹⁵ Than up‐spak Peter, and quoʼ he, “Expone to us the parable!”

¹⁶ And Jesus says, “Are ye eʼen yet wantin knowledge?

¹⁷ “Div ye no ken, that whateʼer may gang in at the mooth, finʼs its way intil the paunch, and is cuisten oot intil the sewer?

¹⁸ “But thae things whilk come frae the mooth, come oot frae the heart, and they fyle the man!

¹⁹ “For frae the heart come oot ill‐thochts, bludeshed, adulteries, lecherie, thievin, fause‐sweerin, blasphemies;

²⁰ “Thir things fyle a man; but to eat wiʼ hauns unpurifyʼt fyles‐na a man!”

²¹ And Jesus gaed thence, and cam to the pairts oʼ Tyre and Sidon.

²² And see! a Canaanite wumman cam oot frae thae pairts, and cryʼt oot till him; and quoʼ she, “Hae pitie on me, O Lord, thou Son oʼ Dauvid! my dochter is sair vexʼt wiʼ a demon!”

²³ But he answerʼt her no a word. And his disciples cam and entreatit him, and quoʼ they, “Send her awa, for she skreighs eftir us!”

²⁴ But he answerʼt, and said, “I wasna sent, but to the forwanderin sheep oʼ Israʼlʼs hoose!”

²⁵ And she cam nar, and worshippʼt him, sayin, “Lord! help me!”

²⁶ But quoʼ he, “It isna bonnie to tak bairnsʼ breid, and to cast it to the dowgs!”

²⁷ And she said, “Even sae, Lord! yet the vera dowgs eat oʼ the mools faʼin frae the maisterʼs buird!”

²⁸ Than answerʼt Jesus till her, “Eh, wumman! yere faith is great! Lat it be till ye as ye wull!” And her dochter was made hale frae that ʼoor.

²⁹ And Jesus gaed awa frae that place, and came nar to the Loch oʼ Galilee; and gaed up intil a mountain, and sut him doon.

³⁰ And great croods oʼ folk cam to him, haein wiʼ them lameters, sichtless, dumb, maimed, and mony mair; and laid them doon at Jesusʼ feet; and he healed them.

³¹ Sae that the folk ferlied uncolie, to behauld the dumb speakin, the maimed hale, the lameters to gang, and the blinʼ seein; and they glorifyʼt the God oʼ Israʼl.

³² Than Jesus caʼd his disciples to him, and quoʼ he, “I hae pitie on the folk, for that they hae been wiʼ me noo thrie days, and hae nae meat; and I winna send them awa, least they soud swarf iʼ the gate.”

³³ And the disciples said to him, “In whatna way coud we hae sae muckle breid iʼ the wilderness, as to fill sae great a crood oʼ folk?”

³⁴ Jesus says to them, “Hoo mony bannocks hae ye?” And they said, “Seeven; and a wheen wee speldrins.”

³⁵ And he commandit the folk to sit doon on the grunʼ.

³⁶ And he took the seeven bannocks, and the fish, and gied thanks; and he brak, and gied to the disciples, and they to aʼ the folk.

³⁷ And they did aʼ eat, and war filled; and they gaitherʼt up oʼ the broken meat left, seeven creels fuʼ.

³⁸ And they wha did eat war fowr thoosanʼ men, forby weemen and bairns.

³⁹ And he sent the folk awa; and gaed intil a boat, and cam to the pairts oʼ Magadan.