Matthew 14 - New Testament in Braid Scots 1904 (William Wye Smith)

CHAPTIR FOWRTEEN. Herod slays John. Breid iʼ the wilderness, Christʼs fit‐road on the sea.

¹ Aboot that time Herod, the King‐Depute, heard aʼ that was said aboot Jesus.

² And quoʼ he to them oʼ his hoosehauld, “This maun be John the Baptist; he is risen frae the deid; and sae div thir pooers schaw theirsels in him.”

³ For Herod had grippit John, and putten him in bonds; and cuist him intil prison for the sake oʼ Herodias, wife oʼ his brither Philip.

⁴ For John said till him: “It is no allooʼd for ye to hae her!”

⁵ And whan he wad hae putten him to deid, he was fleyʼt oʼ the people, for they reckonʼd him a Prophet.

⁶ But whan Herodʼs birthday cam, the daughter oʼ Herodias danced in the mids oʼ them aʼ, and glamorʼd Herod.

⁷ Whauron, he sware to gie her onything she micht speir.

⁸ And she, bein set on by her mither, said: “Gie me here John Baptistʼs heid, on an aschet!”

⁹ And the king was wae; but for the sake oʼ his aiths, and for thae that sat at meat wiʼ him, he commandit it to be gien to her.

¹⁰ And he sent, and beheidit John iʼ the prison.

¹¹ And his heid was brocht on an aschet, and gien to the lass; and she brocht it till her mither.

¹² And his disciples cam, and took up the body, and buryʼt it; and gaed and tellʼt Jesus.

¹³ And whan Jesus heard it, he gaed awa by boat till a desert‐place oot‐by; and whan the croods heard oʼt, they followʼt on fit frae the toons.

¹⁴ And he cam oot, and saw a great thrang; and he had pitie on them and healed their sick anes.

¹⁵ And whan the eʼenin cam on, his disciples cam till him, and quoʼ they, “This is but a desert bit, and the time is gaun by; send the folk awa, that they may gang to the neebor toons, and buy theirsels meat!”

¹⁶ But Jesus said to them, “They need‐na gang awa; gie ye them to eat!”

¹⁷ Quoʼ they to him, “We hae here but fyve bannocks and twa fish.”

¹⁸ He said, “Fesh them here to me!”

¹⁹ And he garʼt the crood sit doon on the gerss; and took the fyve bannocks and the twa speldrins, and lookin up till Heeven he gied thanks, and brak, and gied the bannocks to the disciples, and the disciples to the folk.

²⁰ And they aʼ did eat, and war satisfyʼt; and they liftit oʼ the broken bits that war left, twal baskets fuʼ.

²¹ And they wha had eaten war aboot fyve thoosand men, forby weemen and weans.

²² And at ance he garʼt his disciples gang intil the boat, and gang awa first to the ither side, till he wad send the crood awa.

²³ And whan he had sent the crood awa, he gaed up intil a mountain by his‐sel to pray; and whan eʼenin fell he was thar alane.

²⁴ But the boat was noo iʼ the mids oʼ the Loch, vexʼd wiʼ the waves: for the wund was contrar.

²⁵ And iʼ the hinmaist watch oʼ the nicht Jesus cam to them, gangin on the sea.

²⁶ And whan the disciples saw him walkin on the sea, they war sair gliffʼt, saying, “It is a ghaist!” And they cryʼt oot for fear.

²⁷ And at ance Jesus spak to them, “Be oʼ gude heart! It is I; fear‐na!”

²⁸ And Peter answerʼt and quoʼ he, “Lord, gin it be thou, bid me come till thee on the watir!”

²⁹ And he said, “Come!” And whan Peter was gotten doon oot oʼ the boat, he walkit on the watir to gang tae Jesus.

³⁰ But whan he saw the wund gousty, he fearʼt; and as he begude to sink he cryʼt oot, “Lord, save me!”

³¹ And at ance Jesus raxed oot his haun, and grippit him, saying to him, “O thou oʼ sic smaʼ faith, why did thou fear?”

³² And whan they war gane up intil the boat, the wund was lown.

³³ And they iʼ the boat worshippʼt him, saying, “Truly thou art the Son oʼ God!”

³⁴ And whan they gat ower, they cam to the land, to Gennesaret.

³⁵ And whan the men oʼ that place had kennin oʼ him, they sent oot intil aʼ the kintra‐side, and feshʼt till him aʼ that war ailin;

³⁶ And entreatit him that they micht but touch the border oʼ his garment; and aʼ that touched were made hale.