Mark 7 - New Testament in Braid Scots 1904 (William Wye Smith)

CHAPTIR SEEVEN. The Pharisees needit to wesh their hearts mair nor their hauns. The Canaanite mither wha wadna gang withoot a blessin. Speech and hearin at his bidden!

¹ And thar are gatherʼt aboot him the Pharisees, and the Scribes that had come doon frae Jerusalem.

² And, takin tent that some oʼ his disciples war eatin breid wiʼ unpurifyʼt — that is, unweshen — hauns, they challenged them.

³ For the Pharisees, and aʼ the Jews, gin they wesh‐na their hauns religiously, eat‐na; haudin fast the traditions oʼ the Elders.

⁴ And comin frae the merkit — gin they wesh‐na their sels, they eat‐na. And mony mair things are thar that they hae acceptit to haud; — purifyin oʼ cups and stowps, coppers and table?-?couches.

⁵ And the Pharisees and the Scribes speir at him, “Hoo isʼt thy disciples gang‐na conform to the tradition oʼ the Elders, but eat their breid wiʼ unpurifyʼt hauns?”

⁶ But he said, “Weel did Esaiah prophesie oʼ you, dissemblers! as it is putten doon:— ‘This nation honor me wiʼ their lips, but their heart they haud faur‐awa frae me!

⁷ “ ‘But they offer devotion to me in vain, teachin as precepts the commandments oʼ men.’

⁸ “For haein put‐awa Godʼs commaun, ye haud fast the tradition oʼ men — purifyin oʼ cups and stowps; and mony sic‐like things ye do.”

⁹ And he said to them, “Fuʼ weel ye reject the commaun oʼ God, that ye may haud yer ain tradition.

¹⁰ “For Moses said, ‘Honor yere faither and yere mither: and wha sal revile faither and mither, by death lat him dee.’

¹¹ “But ye say, Gin a man sal say to his faither or his mither, ‘Whatsoeʼer ye micht hae frae me is Corban,’ — that is, dedicate to God —

¹² “Ye nae mair suffer him to do aucht for his faither or his mither,

¹³ “Makin void Godʼs word by yere tradition ye hae deliverʼt! And mony sic things ye do.”

¹⁴ And caʼin to him the thrang oʼ folk again, he says to them, “Hear me, every ane oʼ ye, and understaun!

¹⁵ “Thar is naething frae withoot a man, enterin intil him, can fyle him; but the things that gae forth oot oʼ the man, they fyle him.

¹⁶ “Gin ony ane has hearin to hear, lat him tak tent!”

¹⁷ And whan he was come intil the hoose frae the thrang, his disciples speirʼt at him anent the parable.

¹⁸ And he says to them, “Are even you wantin discernment? Can ye no see that whatsoeʼer frae withoot that comes intil the man, canna fyle him?

¹⁹ “For it comes‐na ben intil his heart, but only to his stammack; and gaes intil the sewer, purifyin aʼ meat.”

²⁰ This he said, moreover, “What comes forth oot oʼ the man, that fyles the man!

²¹ “For frae within, frae ben iʼ the hearts oʼ men, ill designs come forth: lecherie, thefts, murders,

²² “Adulteries, covetins, knaveries, deceit, wantonness, envy, evil?-?speakin, loftiness, foolishness;

²³ “Aʼ thir ill things proceed frae within, and they fyle the man!”

²⁴ And frae thar he raise, and gaed intil the borders oʼ Tyre and Sidon. And he enterʼt intil a hoose, and wad hae nae man ken; but he coudna be keepit private.

²⁵ But forthwith a wumman, whase wee dochter had a foul spirit, hearinʼ aboot him, cam and fell doun at his feet.

²⁶ The wumman was a Greek, a Canaanite by blude; and she besocht him that he wad cast the demon oot oʼ her dochter.

²⁷ And he said to her, “The bairn soud first be satisfeeʼt; it isna bonnie to tak the bairnʼs breid, and cast it to the dowgs.”

²⁸ But she answerʼt, and said to him, “Eʼen sae, Lord; yet the wee dowgs aneath the table eat oʼ the mools oʼ the bairns?”

²⁹ And he said to her, “For that word, gang yere ways; the demon has gane forth oot oʼ yere dochter.”

³⁰ And gaun awa to her hoose, she faund the bairn lyin on the couch, and the demon gane forth.

³¹ And again, gaun forth oot oʼ the pairts oʼ Tyre, he cam throwe Sidon to the Loch oʼ Galilee, up throwe the pairts oʼ the Ten Cities.

³² And they bring to him ane that can hear nane, and speak but a wee; and they beg that he wad lay his haun on him.

³³ And he led him aside frae the thrang, and pat his fingers intil his lugs, and touched his tongue wiʼ spittle;

³⁴ And lookin up to heeven, he gied a sigh, and said, “Ephphatha!” that is, “Be thou unbarred!”

³⁵ And his lugs war unsteekit, and the string oʼ his tongue was lowsed, and he spak plain.

³⁶ And he instruckit them that they soud tell nane: but accordin as he instruckit them, sae muckle the mair did they tell oʼt:

³⁷ And they were astonishʼt ayont aʼ bounds, sayin, “He has done aʼ things weel! He gars eʼen the deif to hear, and the dumb to speak!”