Mark 3 - New Testament in Braid Scots 1904 (William Wye Smith)

CHAPTIR THRIE. The wizzenʼd haun. The twalʼ waled oot. “Whaʼs my mither?”

¹ And he cam again to the kirk; and a man was thar wiʼ a wizzenʼ haun.

² And they keepit watch ower him, gin he wad heal him on the Sabbath; sae as they micht wyte him.

³ And quoʼ he to the man wiʼ the wizzenʼd haun, “Staun forth iʼ the mids!”

⁴ And to them, quoʼ he, “Isʼt richt on the Sabbath to do gude or to do ill? to save life or to slay?” But they said nocht.

⁵ And lookin roond aboot on them wiʼ indignation — haein grief for sic hardenin oʼ their hearts — he says to the man, “Rax oot yere haun!” And he strauchtit it oot; and his haun was made richt.

⁶ And the Pharisees gaed oot, and begude coonsellin wiʼ Herodʼs pairty again him, hoo they micht mak awa wiʼ him?

⁷ And Jesus, wiʼ his disciples, retirʼt to the Loch; and a great thrang frae Galilee followʼt; and frae Judea,

⁸ And frae Edom, and ayont Jordan; and aboot Tyre and Sidon, a great thrang, hearin aʼ the things that he did, cam till him.

⁹ And he spak to his disciples, that a smaʼ boat soud wait on him, on account oʼ sae mony folk: that they soudna thrang him.

¹⁰ For he healed a hantle oʼ them; and they wiʼ plagues pressʼt on him to touch him.

¹¹ And foul spirits, whan they saw him, fell at his feet, cryin oot, “Thou art Godʼs Son!”

¹² And he chairged them stricklie that they soud‐na mak him to be kent.

¹³ And he gaed up the mountain; and cries to him wham he wad hae; and they cam till him.

¹⁴ And he waled oot twalʼ, that they micht be wiʼ him, and sae as he coud send them oot to preach;

¹⁵ And to hae authoritie to expel demons.

¹⁶ And he gied the name Peter to Simon;

¹⁷ And James; and John, brither oʼ James; them he caʼd “Boanerges,” meanin, “Men oʼ Thunner.”

¹⁸ And Andro, and Philip, and Bartholomie, and Matthew, and Tammas, and James oʼ Alpheus, and Thaddeus, and Simon the Zealot.

¹⁹ And Judas Iscariot, wha eʼen deliverʼt‐him‐up. And they gaed intil a hoose.

²⁰ And the thrang cam thegither again; sae that they coudna eʼen get their breid eaten.

²¹ And hearin oʼt, his ain folk gaed oot to grip him; for they said, “Heʼs clean wud!”

²² And the Scribes — the anes that cam doon frae Jerusalem — said, “He has Beelzebul;” and, “by the prince oʼ the demons, the demons are cuisten oot.”

²³ And he brocht them nar, and says to them in parables, “Hoo isʼt that Sautan casts oot Sautan?”

²⁴ And, “Gin a kingdom be set again itsel, that kingdom maun faʼ!”

²⁵ And, “Gin a hoose be set again itsel, that hoose canna staun!”

²⁶ And, “Gin Sautan rise up again his sel, and be twa, he canna staun, but comes till an end.

²⁷ “Nae man comes intil the hald oʼ a michty man, to harrie his gudes and gear, till he has first bund‐doon the strang ane; and than wull he harrie his hoose.

²⁸ “Truly say I tʼye, aʼ things sal be forgien to the sons oʼ men, and aʼ the sins, and aʼ the miscaʼin they miscaʼ wiʼ;

²⁹ “But wha sal miscaʼ the Holie Spirit has pardon nevir! but is fetterʼd by an eternal sin!”

³⁰ For that they war sayin, “He has a foul spirit!”

³¹ Than cam his mither and his brithers; and staunin oot‐by, they sent till him, and caʼd him.

³² And thar war mony folk sittin aboot him; and they say to him, “See! yere mither and yere brithers are oot‐by, seeking ye!”

³³ And he, answerin them, said, “Wha is my mither and my brithers?”

³⁴ And, lookin roond on thae sittin aboot him, he says, “See! my mither and my brithers!

³⁵ “For wha dis the wull oʼ God, that same is my brither, and sister, and mither!”