Mark 16 - New Testament in Braid Scots 1904 (William Wye Smith)

CHAPTIR SAXTEEN. The risin frae the deid. He schaws his sel; and then ascends.

¹ The Sabbath bein by, Mary Magdalene, and Mary oʼ James, and Salome, coft them spices, that they micht come and anoint him.

² And early on the first day oʼ the week, they come to the tomb, at the sun‐risin.

³ “And they war sayin to thir sels, “Wha wull row us awa the stane frae the door oʼ the tomb?”

⁴ And, lookin up, they see that the stane is rowʼt awaʼ; for it was an unco bouk.

⁵ And, gangin intil the tomb, they saw a young man sittin on the richt, clad in a lang, white robe; and they war unco fleyʼt.

⁶ But he says to them, “Be na fleyʼt! Ye seek Jesus, the Nazarene, the Crucifyʼt. He raise! He isna here! See the place whaur they laid him.

⁷ “But gang; tell his disciples and Peter, that he gaes afore you intil Galilee, thar sal ye see him; eʼen as he tauld ye.”

⁸ And gangin oot, they fled frae the tomb; for fear and quakin had come on them; and they tauld nocht to ony; for they war terrifyʼt.

⁹ And, comin forth early on the first day oʼ the week, he was first made kent to Mary Magdalene, frae wham he had cuisten oot seeven demons.

¹⁰ She gaed awaʼ and tellʼt thae that had been wiʼ him, as they maenʼd and grat.

¹¹ And they, whan they war tellʼt that he was leevin, and seen by her, wadna believe.

¹² And eftir thae things, he was schawn in anither form to twa oʼ them, as they walkit and gaed oot intil the kintra.

¹³ And they gaed awaʼ, and tellʼt it to the lave: neither believʼt they them.

¹⁴ But eftir, to the Eleeven their sels he was schawn, as they sat at meat; and he wytit them for their dootsomness and hardness oʼ heart, no to lippen to them wha had seen him eftir he raise.

¹⁵ And he said to them, “Gang ye to aʼ the warld, and preach the Gude‐Tidins to the hale creation!

¹⁶ “Wha believes and is bapteezʼt sal be savʼt; but wha disbelieves sal be condemned.

¹⁷ “And uncos sal follow them that believe; in my name sal the demons be cuisten oot; they sal speak wiʼ tongues;

¹⁸ “They sal tak up vipers; and gin aiblins they drink ony deidly draught, it sal be nae ill to them; they sal lay hauns on the sick, and they sal be weel!”

¹⁹ Sae than the Lord Jesus, eftir he had spoken to them, was taʼen up till Heeven, and sat doon on the richt haun oʼ God:

²⁰ And they gaed oot, and preached aʼ‐gate; the Lord workin wiʼ them, and makin siccar the Word wiʼ the uncos that followʼt.