Mark 11 - New Testament in Braid Scots 1904 (William Wye Smith)

CHAPTIR ELEEVEN. The lowly triumph. The feckless fig‐tree.

¹ And whan they cam nar to Jerusalem, to Bethphage and Bethanie at the Mount oʼ Olives, he sent awa twa oʼ his disciples.

² And says to them, “Gang yere ways to the clachan fornent ye; and as sune as ye are come intilʼt, ye sal see a cowt tethered, whauron nae man evir sat; lowse him and fetch him.

³ “And gin ony man say ocht to ye, or “Why dae ye this?” say ye, ‘The Maister has need oʼ him, and belvye he sends him back again.’ ”

⁴ And they gaed their ways, and faund the cowt tethered at a door oot‐by iʼ the street; and they lowse him.

⁵ And some oʼ thae that stude thar says to them, “What are ye daein? lowsin the cowt?”

⁶ And they tellʼt them eʼen as Jesus said to them; and they loot them gang.

⁷ And they fesh the cowt till Jesus; and they cuist on him their manteels; and he sat upon them.

⁸ And a hantle spread their manteels iʼ the way; and ithers green branches, cuttin them oot oʼ the fields.

⁹ And they that gaed afore, and they that followʼt eftir, cryʼt, “Hosanna! Blessed is he wha comes iʼ the name oʼ the Lord!

¹⁰ “Blessed is the comin kingdom oʼ oor faither Dauvid! Hosanna iʼ the highest Heeven!”

¹¹ And he enterʼt intil Jerusalem, intil the Temple; and whan he had taen tent oʼ aʼ things, it noo wearin late, he gaed oot till Bethanie wiʼ the Twalʼ.

¹² And on the morn, whan he cam back frae Bethanie, he hungerʼt.

¹³ And seein a fig‐tree ayont, fuʼ oʼ leaves, he gaed, gin aiblins he micht finʼ onything onʼt: and whan he cam tillʼt, he faund naething but leaves; for it wasna the time oʼ figs.

¹⁴ And Jesus spak, and says to it, “Nae man forever again eat frute oʼ thee!” and his disciples war listenin tillʼt.

¹⁵ And they cam to Jerusalem; and enterin the Temple, he begude to caʼ oot thae sellin and buyin iʼ the Temple; and cowpit ower the tables oʼ the nifferers oʼ siller, and the binks oʼ thae that trokit wiʼ doos:

¹⁶ And he wadna suffer ony man to cairry veschels throwe the Temple.

¹⁷ And he was teachin, and sayin to them, “Is it no putten doon, ‘My Hoose sal be named a Hoose oʼ Prayer for aʼ people;’ but ye hae made it a howff oʼ robbers!”

¹⁸ And the Heid‐priests and the Scribes heard; and coonsellʼt hoo they micht destroy him: for they war fleyʼt oʼ him, for aʼ the folk war astonishʼt at his teachin.

¹⁹ And whaneʼer the eʼenin cam, he gaed oot oʼ the citie.

²⁰ And iʼ the mornin as they gaed by, they saw the fig‐tree birslʼt up frae the rutes.

²¹ And Peter caʼin to minʼ, says to him, “Maister! see: the fig‐tree ye bannʼd, is aʼ dwined awa!”

²² And Jesus, answerin to him, says, “Hae ye faith in God!

²³ “For truly say I tʼye, whasae may say to this mountain, ‘Be ye taʼen up, and cuisten intil the sea!’ and doots‐na in his heart — but sal lippen that what he says sal come to pass — he sal win it!

²⁴ “And thus I say to ye, Aʼ things that ye pray and seek for, lippen that ye hae them, and ye sal win them.

²⁵ “And whan prayin ye staun, forgie, gin ye hae ocht again ony ane; that yere Faither wha is in Heeven may forgie yere sins.

²⁶ “For gin ye forgie‐na, yere Faither in Heeven wull forgie‐na your sins!”

²⁷ And they come to Jerusalem again; and as he was walkin aboot iʼ the Temple, the Heid‐priests, and the Scribes, and the Elders, cam to him,

²⁸ And quoʼ they to him, “By whatna authoritie div ye thir things? And wha is he that gied ye this authoritie to do thir things?”

²⁹ But Jesus said, “I wull speir at you aʼe thing; and answer me: and I wull tell ye by whatna authoritie I do thir things:—

³⁰ “Johnʼs Baptism, — wasʼt frae Heeven? or oʼ man? Ye may answer me!”

³¹ And they coonsellʼt amang their sels, sayinʼ, “Gin we say, ‘Frae Heeven,’ he will say, ‘On what grunʼ than, did ye no believe him?”

³² “But gin we sae ‘Frae menʼ ” — they war fleyʼt oʼ the folk; for ane and aʼ held John in veritie to be a prophet.

³³ And they answerʼt Jesus, and said, “We canna tell!” And Jesus says to them, “Nae mair div I tell you by whatna authoritie I do thir things!”